«Бульба засталася толькі ў адной краме»: у расейскай Камчатцы і Чукотцы натуга з прадуктамі

Уся справа з затрымкамі ў пастаўках.

Затрымкі з адпраўкай грузаў з расейскіх партоў Уладзівастока на Камчатку пачалі дасягаць трох месяцаў, заявіў губернатар Камчацкага краю Уладзімір Соладаў. Адтэрміноўкі ў пастаўках тавараў цяпер таксама назіраюцца на Чукотцы, кіраўнік рэгіёну Раман Копін паведаміў, што больш за 200 кантэйнераў чакаюць адпраўкі, мясцовыя ўлады кажуць пра напружаную абстаноўку з прадуктамі, паведамляе znak.com.

Са слоў Уладзіміра Соладава, затрымкі з дастаўкай грузаў звязаныя са «зменамі і крызісам глабальнай лагістыкі, перанакіраваннем грузаў з Кітая з Суэцкага канала на Трансіб». Ён распавёў, што ў партах Уладзівастока назапасілася велізарная колькасць кантэйнераў для адпраўкі на Камчатку, праз што ў рэгіёне «склалася даволі цяжкая сітуацыя».

«Мы зараз назіраем затрымкі паставак тавараў да Камчаткі, якія ў шэрагу выпадкаў дасягаюць трох месяцаў. У апошні тыдзень сітуацыя трохі нармалізавалася - прынамсі, прадукты харчавання ўсе адпраўляюцца дакладна ў тэрмін, некаторыя затрымкі застаюцца па будаўнічых матэрыялах», - паведаміў ён у Instagram.

Улады Камчацкага краю звярнуліся да паўнамоцнага прадстаўніка прэзідэнта ў Далёкаўсходняй федэральнай акрузе Юрыя Трутнева, пасля чаго Мінтрансу даручылі «разабрацца ў сітуацыі і ўзяць яе на кантроль».

«Мы, у сваю чаргу, на ручным кантролі трымаем ход адпраўкі грузаў. На жаль, у найбліжэйшы час сістэмна сітуацыя не вырашыцца, бо, як я ўжо сказаў, яе прычынай стаў глабальны крызіс грузавой лагістыкі. Таму мы можам чакаць такіх жа затрымак і, на жаль, павелічэння кошту адпраўкі», - адзначыў Соладаў.

Кіраўнік Чукоткі Раман Копін паведаміў, што з ліпеня да верасня ў рэгіён заходзіла ўтрая менш суднаў, чым звычайна, праз што ў кастрычніку і лістападзе спатрэбяцца дадатковыя рэйсы. Ён прызнаўся, што «рух вельмі складаны» і пры неабходнасці для дастаўкі тавараў будуць прыцягваць ледаколы.

«У штодзённым рэжыме працягваем адсочваць сітуацыю. Прыярытэт - прадукты харчавання, але гаворка не толькі пра іх. Сёлета шмат задач і будоўляў ва ўсіх раёнах, пачынаецца рэалізацыя інвестпраектаў. Для гэтага трэба даставіць тэхніку, матэрыялы, модульныя канструкцыі. Зараз адпраўкі на Чукотку чакаюць больш за 200 кантэйнераў», - напісаў чыноўнік у Instagram.

У адміністрацыі Правідзенскай гарадской акругі заяўляюць аб «напружанай абстаноўцы з прадуктамі». На гэты момант бульба засталася толькі ў адной краме.

«Нам вельмі хацелася б парадаваць вас хуткім прыходам карабля. Але на жаль! Загрузка судна «Уладзімір Мяснікоў» кампаніі Marintek некалькі разоў зрушвалася. Першапачаткова карабель мы чакалі ў канцы кастрычніка. Зараз яго выхад запланаваны на 21-22 кастрычніка. Тэрмін заходу ў порт «Провидение» будзе залежаць ад умоў надвор'я і разгрузкі ў «Берынговском» і «Анадыры». Спадзяёмся сустрэць яго 5-7 лістапада», - гаворыцца ў паведамленні адміністрацыі.