«Дзейнічаў у адзіночку»: сталі вядомыя новыя падрабязнасці пра забойства дэпутата парламента Вялікабрытаніі
2- 16.10.2021, 12:33
- 2,948
Паліцыя заявіла пра акт тэрарызму.
Паліцыя мяркуе, што забойства дэпутата парламента Вялікабрытаніі Дэвіда Эмеса было актам тэрарызму. Пра гэта паведамляе BBC.
Паводле звестак паліцыі, матывы забойцы маглі быць звязаныя з ісламскім экстрэмізмам. Мяркуецца, што ён дзейнічаў у адзіночку.
Імя злачынцы ў паліцыі пакуль не паведамілі, вядома толькі, што яму 25 гадоў. Як распавялі крыніцы BBC, падазраваны, паводле папярэдніх звестак, падданы Вялікабрытаніі самалійскага паходжання.
Sir David Amess MP 1952-2021 pic.twitter.com/RwCkSkYQi3
— Boris Johnson (@BorisJohnson) October 15, 2021
Прэм'ер-міністр Барыс Джонсан прызнаўся, што перажыў узрушэнне і глыбокі смутак, даведаўшыся пра гібель Дэвіда Эмеса, якога ён назваў адным з найбольш добрых людзей у свеце палітыкі.
Эмес быў забіты ўвечары 15 кастрычніка падчас сустрэчы з выбарцамі ў сваёй прыёмнай у царкве горада Лі-ён-Сі ў графстве Эсэкс. Злачынца некалькі разоў ударыў дэпутата ад Кансерватыўнай партыі нажом.
Гэта першае за пяць гадоў забойства сябра парламента ў Вялікабрытаніі. У 2016 годзе пасля сустрэчы з выбарцамі ў горадзе Берстол была забітая 41-гадовая дэпутатка ад Лейбарысцкай партыі Джо Кокс.