У «Менскметрабудзе» з'явіліся вялікія праблемы з выплатай заробкаў праходчыкам

Працоўныя-метрабудаўцы атрымалі добрую нагоду застацца дома.

Вернемся да тэмы страйку. Вялікія праблемы ў «Менскметрабуда». У сакавіку там ужо былі затрымкі з выплатай заробку. Тады давялося ўмешвацца пракуратуры. Цяпер праходка тунэляў ускладненая тым, што няма грошай на закупку спецыяльнай гумы, якая выкарыстоўваецца пры такіх працах, піша тэлеграм-канал «Нік і Майк».

Пра будаўніцтва метро ў бок Зялёнага Лугу можна забыцца. Таму цяпер працоўныя сканчаюць адрэзак «Слуцкі гасцінец» – «Дружная». Пасля гэтага можа пачацца масавы зыход працоўных. Ужо цяпер скарачаюць дапаможны персанал – электрыкі, сантэхнікі.

Праходчыкі – рэдкая, цяжкая і небяспечная прафесія. Дастаткова складаны адбор паводле здароўя. Менчукоў амаль няма, асноўны кантынгент – рэгіёны. Страчваць такіх супрацоўнікаў – небяспечна. Знайсці іх потым будзе складана. На самай справе менавіта ў гэтым і сіла такіх прафесій. Працадаўца залежыць ад шахцёраў, праходчыкаў. Ні адзін ІТР не зможа выканаць гэтую працу.

Працоўным трэба ўспомніць менавіта пра гэта. А яшчэ – пра павагу, пра якую казаў Бабарыка. Ці адчувалі яны яе ў апошні час? Ці адчувалі яны клопат пра сябе? Хтосьці казаў ім, што, акрамя абавязкаў, у іх яшчэ ёсць і правы?

Нічога гэтага няма.

Цяпер відавочней за ўсё адносіны да беларусаў паказвае тэма кавіду. Поўны ігнор тых праблемаў, якія ёсць. Зноў спроба схаваць галаву ў пясок у надзеі, што яно неяк само пройдзе. Метрабудаўцы, гэта добрая нагода застацца дома. Яшчэ і для таго, каб зберагчы сваё здароўе і здароўе сваіх блізкіх.

Вы ўсё роўна застаняцеся без працы – у хунты няма грошай не толькі на метро, але і на лякарні і школы. Але напрыканцы вы можаце гучна пляснуць дзвярыма. Магчыма, менавіта гэты ўчынак стане важнейшым, чым усе тыя шматлікія кіламетры тунэляў, якія вы пабудавалі.