Што зменіцца ў Беларусі ў снежні?

У наступным месяцы змены закрануць аўтаўладальнікаў.

У снежні 2021 года беларусы канчаткова развітаюцца са старымі грашыма, для іх падаражэюць цыгарэты. Аўтаўладальнікам пагражае штраф за летнія шыны, да таго ж ім трэба да сярэдзіны месяца ўнесці авансавую аплату ў транспартным падатку. Myfin.by паведамляе аб тым, што яшчэ чакае беларусаў у снежні.

Паспейце абмяняць старыя грошы

Калі ў кагосьці яшчэ засталіся старыя грошы, якія былі ў Беларусі да дэнамінацыі, то іх яшчэ можна абмяняць да 31 снежня 2021 года. Як паведамлялася, з 1 студзеня 2022 года, банкноты ўзору 2000 года будуць несапраўдныя і абмяняць іх ужо будзе немагчыма. Старыя грошы прымаюць у касах Нацбанку на вул. Талстога, 6. Касы працуюць толькі ў будныя дні паводле графіку: панядзелак - чацвер з 9:00 да 16:00, пятніца - з 9:00 да 15:00.

Абмен ажыццяўляецца ў суадносінах 10 000 беларускіх рублёў у грашовых знаках узору 2000 года да 1 беларускага рубля ў грашовых знаках узору 2009 года, сказана ў паведамленні рэгулятара.

Авіярэйсы з Гародні ў Маскву

З Гародні ў Маскву наўпроставы рэйс з 2 снежня запускае расейская авіякампанія Nordwind. Рэйсы будуць тры разы на тыдзень: па панядзелках, чацвяргах і суботах. Палёт зойме амаль 1 гадзіну 50 хвілін.

Аванс па транспартным падатку

Да 15 снежня беларусам трэба заплаціць частку транспартнага падатку за свае аўто. Гэта так званая авансавая выплата. А астатнюю частку падатку трэба будзе даплаціць налета. Пры гэтым прадугледжаныя льготы для шэрагу фізічных асоб. Нагадаем, у Беларусі з 1 студзеня замест дзяржпадатку за выдачу дазволу на допуск да ўдзелу ў дарожным руху ўвялі транспартны падатак.

Як паведамлялася раней, у 2021 годзе заплаціць авансавую выплату ў транспартным падатку павінны толькі тыя, хто не меў на 1 студзеня 2021 года дзейнага дазволу на допуск да ўдзелу ў дарожным руху, атрыманага з аплатай дзяржпадатку за яго выдачу.

Сума такой выплаты складае 1 базавую адзінку (цяпер 29 рублёў), а для прычэпа, прычэпа-дачы (каравана) і матацыкла - 20 рублёў.

Калі няма зімовых шын, будзе штраф

Трэба абавязкова пераабуць свае аўто. З 1 снежня тым, хто не зменіць летнія шыны на зімовыя, пагражае папярэджанне ці штраф да 0,5 базавай адзінкі (гэта 14,5 рубля).

Падаражэюць цыгарэты

Паводле звестак МПЗ, з 1 снежня падаражэюць некаторыя маркі цыгарэт. Максімум росту коштаў асобных марак складзе плюс 25 капеек за пачак. Кошты падвышаюць «Беларусьгандаль» і «Тытунь-інвест», а Гаразенская тытунёвая фабрыка «Нёман» і «Інтэр Табака» на гэты раз устрымаліся ад падвышэння.