Карбалевіч: Лукашэнка заявіў, што Беларусь пачне вайну з Украінай у выпадку расейска-ўкраінскага канфлікту
77- 29.11.2021, 20:30
- 38,352
Дыктатар паведамляе беларусам, што збіраецца ўцягнуць краіну ў вайну.
- Лукашэнка заявіў, што Беларусь пачне вайну з Украінай у выпадку расейска-ўкраінскага канфлікту, піша на «Радыё Свабода» палітолаг Валер Карбалевіч.
У мінулым Лукашэнка праяўляў нейтралітэт у расейска-ўкраінскім канфлікце, імкнуўся выканаць ролю міратворца, хацеў прымірыць дзве краіны.
Колькі разоў дагэтуль Лукашэнка заяўляў, што ніякай вайсковай пагрозы брацкаму ўкраінскаму народу з тэрыторыі Беларусі ніколі не будзе, і што калі ён прыедзе ва Украіну, то не на танку, а на трактары.
А зараз усё ў корані змянілася. Не засталося ніякіх прыкмет нейтралітэту. Раней Лукашэнка заяўляў, што ўкраінскі фронт адкрываецца, і прасіў у Расеі сучасную зброю для яго нейтралізацыі.
Сёння ён публічна заявіў: «Калі развяжуць вайну на Данбасе ці дзе-небудзь на мяжы з Расеяй, Беларусь не застанецца ў баку. І зразумела, на чыім баку будзе Беларусь. Яны гэта разумеюць, таму пачалі ўмацоўваць сваю паўночную, беларуска-ўкраінскую мяжу. Хаця для гэтага ніякіх фактаў, сёння няма прычын».
То бок, Лукашэнка не хавае, што Беларусь пачне вайну з Украінай у выпадку расейска-ўкраінскага канфлікту, і ў той жа час здзіўлены, што Кіеў умацоўвае сваю паўночную мяжу - маўляў, «сёння няма падстаў». (?).
Такім чынам, Лукашэнка паведамляе беларусам, што збіраецца ўцягнуць краіну ў вайну. У чужую вайну. Бо гаворка ідзе пра канфлікт у Данбасе, на расейска-ўкраінскай мяжы ўдалечыні ад Беларусі. І з сапраўды брацкім народам, блізкім ва ўсіх сэнсах.
Навошта? Навошта перасаджвацца з трактара на танк? Чаму ён не баіцца негатыўнай рэакцыі беларускага народа, у гістарычнай памяці якога, як стрэмка, сядзіць страх, што добра адлюстравана ў вядомай прымаўцы «абы не было вайны»?
Падобна, у апошні час Лукашэнка атрымлівае некаторае псіхалагічнае задавальненне ад эксперыментаў, якія ён праводзіць над грамадствам.
Для гэтага і краіну замарозілі і ўкаталі ў асфальт. Маўляў, давайце сюды прывязём тысячы мігрантаў і паглядзім, як адрэагуюць беларусы. А давайце паабяцаем уцягнуць краіну ў чужую вайну.
Прыемна тое, што зараз не трэба гуляць у папулізм, старацца падабацца людзям. Цяпер можна быць самім сабой.