Кампанія Трампа прывабіла $1 мільярд інвестыцый у сацсетку

Інвестары ў праект засталіся невядомымі.

Кампанія Trump Media & Technology Group, старшынёй якой з'яўляецца былы прэзідэнт ЗША Дональд Трамп, прывабіла $1 млрд інвестыцый для сваёй сацыяльнай сеткі. Пра гэта напярэдадні паведаміў сайт Axios.

Кошт адной акцыі стартапу склаў блізу $34,36. Інвестары ў праект засталіся невядомымі. Угода прайшла ў фармаце, які прадугледжвае зліццё і паглынанне (SPAC).

Раней кампанія Трампа паведамляла, што сацсетка Truth Social пачне працаваць у пачатку лістапада для абмежаванага кола карыстальнікаў. Пры гэтым паўнацэнная версія, доступ да якой будзе мець уся краіна, павінна запрацаваць у пачатку наступнага года.

Нагадаем, тэставую версію сацсеткі Truth Social узламалі хакеры праз некалькі гадзінаў пасля запуску. Яны апублікавалі фатаграфію свінні на старонцы Дональда Трампа.

Як вядома, пасля штурму Капітолія 6 студзеня 2021 года многія сацыяльныя сеткі, у тым ліку Twitter і Facebook, заблакавалі старонкі Трампа. Пасля гэтага ён спрабаваў знайсці новую пляцоўку і вёў перамовы з некалькімі рознымі платформамі.