«Мігранты адчыняюць дачныя домікі, частуюцца ўсім, што знаходзяць»

Беларусы расказалі, чым зарабляюць нелегалы ў прыгранічнай паласе пад Гародняй.

Падпісчыкі тэлеграм-канала «Баста!» распавялі падрабязнасці аб мігрантах у ІЧУ Гародні:

«Апошнім часам яны сталі зарабляць не толькі крадзяжом на лецішчах у найбліжэйшых ад мяжы раёнах, але і займаць пабудовы, якія можна абаграваць. Адчыняюць домікі, частуюцца ўсім, што знаходзяць, калі ёсць на ўчастках дровы, то апальваюць лецішчы.

Уласна кажучы, у ІЧУ на Гая яны і трапляюць, калі ўладальнікі ці суседзі гэтых лецішчаў выяўляюць няпрошаных гасцей», - паведамляе падпісчык канала.

Нагадаем, што 8 лістапада рэжым Лукашэнкі зладзіў маштабную правакацыю на польскай мяжы. Тысячы мігрантаў пад кантролем беларускіх спецслужбаў штурмавалі мяжу Польшчы. Польскі бок паведамляе, што ў наступных штурмах мяжы могуць узяць удзел да 10 тысяч нелегалаў.

15 лістапада беларускія вайскоўцы сагналі нелегалаў пад канвоем з іх лагера на мяжы з Польшчай да КПП "Брузгі-Кузніца".

16 лістапада мігранты пайшлі на штурм польскай мяжы.

Пасля гэтага мігрантаў размясцілі ў лагістычным цэнтры "Брузгі" на мяжы. Польская разведка паведаміла, што беларускія сілавікі ператварылі цэнтр "Брузгі" ў базу для нападаў мігрантаў на Польшчу.

26 лістапада Лукашэнка пабываў у лагеры мігрантаў, каб узняць іх на новы штурм польскай мяжы.

1 снежня беларускія спецслужбы абстралялі польскі прымежны горад Тэрэспаль. Абстрэлам былі знішчаны асвятляльныя мачты на мяжы з Беларуссю.