У Францыі арыштаваны падазраваны ў забойстве журналіста Джамаля Хашогі

Вайсковец савудаўскай каралеўскай гвардыі затрыманы ў аэрапорце Шарль-дэ-Голь.

У Францыі арыштаваны падазроны ў датычнасці да забойства ў 2018 годзе ў Стамбуле журналіста Джамаля Хашогі (Хашкаджы). Пра гэта паведамляе BBC.

Падазраваны Халед Аед аль-Атайбі быў арыштаваны ў аўторак у парыжскім аэрапорце Шарль-дэ-Голь, паведамілі французскія СМІ. Ён адзін з 26 савудытаў, якія адшукваюцца Турцыяй паводле справы аб забойстве журналіста.

Халед аль-Атайбі - 33-гадовы вайсковец каралеўскай гвардыі, прыбыў у Францыю пад сваім імем і пасля затрымання ўзяты пад варту.

Джамаль Хашогі, які супрацоўнічаў з амерыканскай газетай Washington Post і меў дазвол на жыхарства ў ЗША, неаднаразова крытыкаваў улады Савудаўскай Арабіі. Ён загінуў у кастрычніку 2018 года, ягонае цела так і не было знойдзена. Вядома, што журналіст пайшоў на прыём у консульства Савудаўскай Арабіі ў Стамбуле, каб аформіць дакументы аб разводзе з жонкай, пасля гэтага ніхто яго не бачыў. Праз некалькі тыдняў улады ў Эр-Рыядзе прызналі, што Хашогі памёр на тэрыторыі дыппрадстаўніцтва, але адмовіліся расказваць, як гэта адбылося.

Савудаўскія ўлады спачатку сцвярджалі, што журналіст нібыта памёр выпадкова, у выніку бойкі з супрацоўнікамі консульства. Аднак турэцкія спецслужбы мяркуюць, што Хашогі стаў ахвярай "жорсткага і наўмыснага забойства, спланаванага і ўчыненага службовымі асобамі Савудаўскай Арабіі". Адразу ж пасля знікнення Хашогі яны паляцелі са Стамбула дадому на лайнеры, які належала кіроўнай сям'і.

Турэцкія афіцыйныя крыніцы заяўляюць, што агенты дзейнічалі на загад, аддадзены на самым вышэйшым узроўні ўлады ў Эр-Рыядзе.

Праз некалькі месяцаў былі апублікаваны запісы праслухоўвання консульства Савудаўскай Арабіі ў Стамбуле. Паводле іх, калі Хашогі ўвайшоў у будынак консульства, яго амаль адразу сустрэла група чыноўнікаў, якія прыбылі з Эр-Рыяду. Яны заявілі, што яго шукае Інтэрпол і зараз яго дэпартуюць у Савудаўскую Арабію. Як расказалі міжнародныя выведнікі, Хашогі да апошняга моманту пытаўся, ці з'яўляецца гэта выкраданнем і ці зробяць яму спецыяльную ін'екцыю. На гэта яму пазней адказалі станоўча.

23 снежня 2019 года пяцёра чалавек былі прысуджаныя да пакарання смерцю (трое фігурантаў атрымалі агулам 24 гады), аднак у траўні 2020 года сям'я журналіста заявіла, што даравала вінаватым, і папрасіла аб іх памілаванні. Згодна з законамі каралеўства, у такім выпадку абвінавачанага нельга прыгаварыць да смяротнага пакарання.

Пяцёра фігурантаў справы замест смяротнага пакарання атрымалі па 20 гадоў пазбаўлення волі. Астатнім траім прысуд пакінулі ў дзеянні: адзін чалавек атрымаў 10 гадоў пазбаўлення волі, яшчэ двое - па сем.