Саакашвілі заявіў, што яго абвінавачваюць у паходзе ў лазню з Юшчанкам і ў пачастунку гарбатай Клінтан

Экс-прэзідэнт Грузіі даў інтэрв'ю з турмы.

У абвінавачанні ў растраце бюджэтных сродкаў, выстаўленым трэцяму прэзідэнту Грузіі Міхаілу Саакашвілі, згадваецца факт яго паходу ў серную лазню разам з экс-кіраўніком Украіны Віктарам Юшчанкам і пачастункам гарбатай амерыканскага палітыка Хілары Клінтан.

Пра гэта сам Саакашвілі заявіў у інтэрв'ю журналістцы «Нового времени» Крысціне Бярдзінскіх.

«Мае суды і абвінавачванні настолькі смяхотныя, што іх сур'ёзна не варта абмяркоўваць. Справа ў тым, што гэтыя справы «шылі» так, што не думалі, што я сам з'яўлюся на судзе. Напрыклад, адно абвінавачванне ў растраце ўтрымлівае факт паходу разам з Юшчанкам, у той час як ён займаў пасаду прэзідэнта Украіны, у серную лазню, а таксама пачастунак чаем Хілары Клінтан», - паведаміў ён.