«Паўночны струмень – 2»: Адзін з пяці ўдзельнікаў праекта спыніў фінансаванне праз санкцыі ЗША

Кампанія ўклала ў праект 730 млн еўраў і далейшыя выплаты не плануюцца.

Нямецкая кампанія ў здабычы прыроднага газу і сырой нафты Wintershall Dea, якая з'яўляецца адной з пяці ўдзельніцаў праекта расейскага газаправода «Паўночны струмень – 2», заявіла пра спыненне фінансавання праз санкцыі ЗША.

Як паведамляе «Еўрапейская праўда», пра гэта гаворыцца ў гадавой справаздачы на сайце кампаніі.

У дакуменце ўказваецца, што кампанія ўклала ў праект 730 млн еўраў і далейшыя выплаты не плануюцца.

«Плацяжы ў крэдыце для Nord Stream 2 AG склалі 730 млн еўраў і былі закончаныя да перагляду закона "Аб супрацьдзеянні спаборнікам Амерыкі з дапамогай санкцый" (CAATSA). ЗША пастанавілі паставіць праект Nord Stream 2 у больш шырокія геапалітычныя рамкі і пагражаюць усім галінам або бакам, якія ўдзельнічаюць у праекце санкцыямі», – гаворыцца ў справаздачы.

Нямецкая кампанія давала крэдыты на будаўніцтва трубаправода разам з яшчэ чатырма найбуйнейшымі еўрапейскімі энэргетычнымі кампаніямі – Engie, OMV, Shell і Uniper. Кожная з гэтых кампанія павінна была ўкласці да 950 млн еўраў.

У справаздачы таксама адзначаецца, што апошнія падзеі ў ЗША могуць мець наступствы для тэрмінаў будаўніцтва «Паўночнага струменю – 2».

«Чакаецца, што ўрад ЗША прыме агрэсіўны падыход да падраднікаў праекта. У малаверагодным выпадку, калі праект не закончыцца і / або "Паўночны струмень – 2" не зможа абслугоўваць пазыкі, існуюць дамоўныя палажэнні, якія абмяжоўваюць фінансавую рызыку для Групы», – адзначаецца ў дакуменце.

Раней паведамлялася, што прынамсі 18 еўрапейскіх кампаній спынілі ўдзел у праектах «Паўночны струмень – 2» або знаходзяцца ў працэсе выхаду з яго праз пагрозу санкцый ЗША. Сярод іх называлася і «Munich Re».

Трубаправод скончаны больш чым на 90%, і кампанія «Газпрам» і яе заходнія партнёры спадзяюцца скончыць яго сёлета.

Зрэшты, у «Газпраме» пачалі прызнаваць, што для праекта з'явіліся рызыкі.

На днях Украіна і Польшча разам заклікалі Байдэна не дапусціць заканчэння будаўніцтва «Паўночнага струменю – 2».