Адміністрацыя Байдэна падтрымала рэформу выбарчай сістэмы ў ЗША

Палата прадстаўнікоў гатовая прыняць радыкальны законапраект.

Адміністрацыя Байдэна падтрымала намаганні дэмакратаў у пераглядзе правілаў галасавання і перадачу працэсу стварэння межаў выбарчых участкаў незалежным камісіям, паведамляе «Голас Амерыкі».

Злучаныя Штаты сутыкнуліся з «беспрэцэдэнтным нападам на нашу дэмакратыю, у нябачанай раней спробе праігнараваць, падарваць і скасаваць пастанову народа, а таксама з новай агрэсіўнай атакай на выбарчыя правы, якая адбываецца проста цяпер па ўсёй краіне» - гаворыцца ў заяве адміністрацыйна-бюджэтнага кіравання прэзідэнта Джо Байдэна.

Палата прадстаўнікоў збіраецца прагаласаваць і, магчыма, прыме радыкальны законапраект аб рэформе выбараў HR-1 ужо на гэтым тыдні. Дэмакраты маюць большасць у Палаце прадстаўнікоў, але наўрад ці законапраект будзе прыняты Сэнатам, дзе неабходна згода 60 заканадаўцаў.

Рэспубліканцы заявілі, што закон пазбавіць штаты існых паўнамоцтваў і выказалі асцярогі з нагоды магчымага махлярства на выбарах.

Дэмакраты змагаюцца за пашырэнне магчымасцяў удзелу ў выбарах з дапамогай датэрміновага галасавання, галасавання праз пошту і іншых мер. Рэспубліканцы, у сваю чаргу, змагаюцца з гэтымі высілкамі і прымаюць захады для абмежавання доступу да выбарчых урнаў. Былы прэзідэнт ЗША Дональд Трамп у сваім першым публічным выступе з моманту паразы на выбарах 3 лістапада, прапанаваў абмежаваць датэрміновае галасаванне і дні, калі амерыканцы могуць гэта зрабіць.

Байдэн перамог Трампа на прэзідэнцкіх выбарах у лістападзе 2020 года, набраўшы на 7 мільёнаў галасоў больш.

Трамп ніколі не прызнаў паразы, а некаторыя з яго прыхільнікаў люта аспрэчвалі сертыфікацыю выбараў Кангрэсам, што прывяло да беспарадкаў 6 студзеня на Капіталійскім пагорку.

З тых часоў дзясяткі мясцовых заканадаўцаў-рэспубліканцаў унеслі законапраекты, якія абмяжоўваюць галасаванне ў сваіх штатах. Напрыклад, законапраект, прапанаваны ў штаце Джорджыя, забараняе ўстаноўку спецыяльных скрыняў для бюлетэняў за межамі выбарчых участкаў, і касуе датэрміновае галасаванне ў нядзелю. Са слоў актывістаў, гэта можа мець катастрафічныя наступствы для чарнаскурых выбарцаў. У 43 штатах унесены законапраекты аб абмежаванні галасавання ў тым ці іншым выглядзе.

Таксама наспявае барацьба з-за будучых змен межаў выбарчых участкаў, якія ўплываюць на тое, як тая ці іншая частка краіны будзе прэзентаваная тым ці іншым заканадаўцам у Палаце прадстаўнікоў. У многіх штатах гэты працэс узначальваюць заканадаўчыя сходы штатаў, якія ў асноўным кантралююцца рэспубліканцамі.

Мясцовыя заканадаўчыя органы гістарычна перакройвалі межы ўчасткаў такім чынам, каб іх партыя перамагла ў большай колькасці выбараў, часам зводзячы да мінімуму ўплыў чарнаскурых выбарцаў.

Законапраект Палаты прадстаўнікоў перадасць большую частку гэтых паўнамоцтваў камісіям, якія, са слоў рэспубліканцаў, не будуць падсправаздачныя жыхарам у іх штатах.