Мінюст масава пазбаўляе ліцэнзій адвакатаў, датычных да палітычных спраў

Сёння з сямі адвакатаў, выкліканых на кваліфікацыйную камісію, прайшоў толькі адзін.

Адвакатаў, якія выказваюць сваю грамадзянскую пазіцыю паводле палітычных спраў, сталі масава выклікаць на кваліфікацыйную камісію ў пытаннях адвакацкай дзейнасці пры Міністэрстве юстыцыі.

Як паведамляе БелаПАН, 3 сакавіка на атэстацыю былі выкліканыя сем адвакатаў. Паспяхова прайшоў яе толькі адзін з іх. Трое - Андрэй Барташэвіч, Алена Шынкарэвіч і Мікалай Етка - не атэставаныя. Гэта значыць, што іх адвакацкія ліцэнзіі будуць прыпыненыя. Яшчэ тры адвакаты прайшлі атэстацыю «ўмоўна» - у іх паўгадавы выпрабавальны тэрмін, пасля якога іх лёс будзе разглядацца паўторна.

Паводле звестак БелаПАН, у сакавіку на камісію выклікана некалькі дзясяткаў адвакатаў. На сёння ў Беларусі, як сказаў журналістам прадстаўнік адвакацкай супольнасці, амаль 200 адвакатаў, якія абараняюць грамадзян у гучных справах, звязаных з правамі чалавека і палітычнымі працэсамі. Яны таксама публічна выказваюцца супраць гвалту.

Наступнае пасяджэнне кваліфікацыйнай камісіі па атэстацыі адвакатаў прызначанае на 24 сакавіка.

Апошнім часам адвакацкай ліцэнзіі былі пазбаўленыя Аляксандр Пыльчанка і Людміла Казак - яны абаранялі інтарэсы Марыі Калеснікавай. Пыльчанка таксама прадстаўляў інтарэсы Віктара Бабарыкі. Таксама Мінюстыцыі пазбавіла ліцэнзій адвакатаў Юлію Леванчук, Канстанціна Міхеля, Міхаіла Кірылюка, Максіма Конана. Цяпер спрабуюць пазбавіць ліцэнзіі Уладзіміра Сазанчука, які абараняе палітыка Мікалая Статкевіча, блогера Змітра Казлова і журналістку Кацярыну Андрэеву (Бахвалаву).