Польшча падтрымала санкцыі ЗША высылкай расейскіх дыпламатаў
3- 15.04.2021, 20:50
- 9,498
Варшава абвесціла трох расейскіх дыпламатаў персонамі нон-грата.
Варшава абвесціла трох расейскіх дыпламатаў персонамі нон-грата, іх вышлюць з краіны, паведаміла прэс-служба Міністэрства замежных справаў Польшчы.
У дыпламатычнай установе паведамілі, што 15 красавіка расейскі амбасадар Сяргей Андрэеў быў выкліканы ў МЗС, дзе яму ўручылі ноту з інфармацыяй наконт прызнання персонамі нон грата трох супрацоўнікаў амбасады Расеі ў Варшаве. Іх імёны пакуль не называюцца.
«Падставай для такой пастановы паслужыла парушэнне названымі асобамі ўмоваў дыпламатычнага статусу і ажыццяўленне дзейнасці на шкоду Рэспублікі Польшча», – гаворыцца ў паведамленні.
Разам з тым польскае МЗС паведаміла, што Варшава выказвае салідарнасць з пастановамі, прынятымі ўладамі ЗША. Гаворка ідзе пра ўвядзенні Вашынгтонам новых санкцыяў у дачыненні да Масквы. «Супольна прынятыя, узгодненыя хаўрусніцкія пастановы – найбольш адэкватны адказ на варожыя дзеянні Расеі», – адзначаецца ў паведамленні.