15 траўня 2021, Субота, 23:26
Сім сім, Хартыя 97!
Рубрыкі

Экс-падпалкоўнік КДБ Валерый Костка: У рэжыму няма ніякай стратэгіі, няма нават тактыкі

22
Экс-падпалкоўнік КДБ Валерый Костка: У рэжыму няма ніякай стратэгіі, няма нават тактыкі
ВАЛЕРЫЙ КОСТКА

Час працуе супраць іх.

Падпалкоўнік КДБ у адстаўцы Валерый Костка пракаментаваў для сайта belprauda.com заяву Лукашэнкі аб падрыхтоўцы замаху на яго з боку ФБР, ЦРУ, Кастусёва, Зяньковіча і Фядуты.

- Гэта гульня, я думаю, супраць найбліжэйшага атачэння, магчыма, нават супраць Лукашэнкі, каб трымаць яго ў арбіце хлуслівай інфармацыі для таго, каб ён прымаў выгадныя для найбліжэйшага атачэння дэкрэты, указы, законы. Бо прыняты закон, які дазваляе супрацоўнікам праваахоўных органаў і спецслужбаў адкрываць агонь на паражэнне на ўласнае меркаванне. Не адзін Лукашэнка адказвае за сітуацыю ў краіне, ягонае найбліжэйшы асяроддзе ў такой жа ступені адказвае за тое, што адбываецца. Па-першае, яно падштурхоўвае да прыняцця такіх пастаноў, а па-другое, яны выконваюць незаконныя ўказы і загады.

Усе разумеюць, што Лукашэнка - часовая фігура, ён сыходзіць. Таму вакол ствараецца балота, якое нібыта захоўвае статус-кво, але ў кожны момант можа высахнуць. Відавочна, у рэжыму няма ніякай стратэгіі, няма нават тактыкі: уся сістэма працуе на банальнае выжыванне - дзень прастаяць ды ноч пратрымацца. Але час працуе супраць палітычнай сістэмы.

У спецслужбах нас вучылі: трэба аналізаваць учорашні і сённяшні дзень і будаваць вектар на дзень заўтрашні. Будуем вектар: эканоміка коціцца ўніз, пратэст нікуды не дзеўся - проста перастаў вылівацца на вуліцы, але не змяншаецца, а толькі нарастае; стасункі з вонкавым светам загнаныя ў кут. Які лакаматыў выцягне сітуацыю? Няма ні лакаматыва, ні нават задрыпанага каня, які мог бы выцягнуць беларускую сітуацыю.

Наколькі ўстойлівы расейскі вектар? У Пуціна сваіх праблем дастаткова, усе размовы пра яго бункернае існаванні таксама вядуцца нездарма, а бразганне зброяй на мяжы з Украінай - таксама невыпадковае. «Грошай няма, але вы трымайцеся», як казаў Мядзведзеў.

Перспектыў няма, стратэгіі і тактыкі няма, ёсць толькі жаданне загнанага ў кут выжыць. Сітуацыя вельмі зыбкая, яна ўсё адно развяжацца не на карысць дыктатуры, не на карысць крыві і гвалту, а на карысць дэмакратыі і дэмакратычных выбараў. І толькі тады мы пачнём развівацца.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».