Штрафбат для лукашыстаў

Судзіць будуць не аднаго дыктатара, а рэжым, што азначае канкрэтныя прозвішчы.

Гаага для Лукашэнкі становіцца ўсё бліжэйшай. Пасля таго, як была створаная Міжнародная платформа для Беларусі для прыцягнення да адказнасці злачынцаў лукашысцкага рэжыму (International Accountability Platform for Belarus), якую падтрымаў Еўразвяз, падрыхтоўка суда над Лукашэнкам перайшла ў практычную плоскасць.

Да платформы падключыліся аўтарытэтныя праваабарончыя арганізацыі з Даніі і Вялікабрытаніі, якія займаюцца расследаваннямі выпадкаў катаванняў, а ўрады гэтых краін выдалі фінансаванне на міжнароднае расследаванне злачынстваў. Сваю дзель ўнесла і Нямеччына.

Гэтую платформу адразу ж падтрымалі ўрады Нямеччыны, Аўстрыі, Бэльгіі, Вялікабрытаніі, Даніі, Ісландыі, Канады, ЗША, Ісландыі, Латвіі, Літвы, Нідэрландаў, Нарвэгіі, Польшчы, Румыніі, Славакіі, Фінляндыі, Чэхіі, Швайцарыі і Эстоніі.

Увогуле, механізм створаны, сродкі выдадзеныя, пачынаецца сістэматызацыя доваднай базы.

Толькі вось судзіць будуць не аднаго Лукашэнку, а рэжым, што азначае канкрэтныя прозвішчы.

Сам Лукашэнка гэта добра ведае і вельмі ўстурбаваны тым, каб у спісах абвінавачаных было як мага больш такіх прозвішчаў.

Дыктатары натурай сваёй баязліўцы, якія толькі выстаўляюць сябе зухамі.

Уся "зухаватасць” Лукашэнкі злезла з яго пры першым жа паходзе ў рэальны, а не прыдуманы "масандрамі" народ. Убачыўшы сапраўдных рабочых на МЗКЦ, якія ў твар яму кінулі "Сыходзь!", ён перапалохаўся ўжо назаўсёды, да канца свайго жыцця.

Усе далейшыя яго істэрыкі, калгасныя спектаклі з віжамі, якія паказваюць радасныя 3 адсоткі, і спробы грозна пагуляць азызлым тварам, - гэта вынік таго самага страху.

А яшчэ ўсе "зухаватыя" дыктатары - гэта прызнаныя стукачы. Яны добра ведаюць сваё найбліжэйшае атачэнне, ведаюць, што на іх нават у найбліжэйшых сваякоў нарыхтаваны шакавальны кампрамат для міжнародных, ды і для ўнутраных судовых працэсаў. Ад тых довадаў ужо не адкараскацца, таму задача дыктатара перапэцкаць і "закласці" як мага больш сваіх змоўшчыкаў.

Лукашэнка актыўна гэтым займаецца з самых першых дзён пратэстаў.

Перапалоханы дыктатар даслоўна праз тыдзень пасля пачатку шматтысячных пратэстаў у Беларусі ўзнагародзіў за ўзорную службу 300 чалавек з міліцэйскай сістэмы. Такое ўражанне, што ён узнагароджваў не за лаяльнасць да сябе ўлюбёнага, а зліваў інфармацыю пра тых, хто ўдзельнічаў у карных аперацыях. Дарэчы, гэты ўказ з прозвішчамі дагэтуль вісіць на афіцыйных сайтах рэжыму.

Потым ён стаў фатаграфавацца з адзначыўшыміся пры разгонах мірных грамадзян. З тымі самымі, якія, збіваючы на вуліцах старых, баяліся не тое, што твар, вочы свае паказаць. Бегалі па вуліцах гэтакія забінтаваныя з ног да галавы муміі.

Менавіта іх Лукашэнка і фатаграфуе на ўсеагульны агляд, а на адным са здымкаў заадно і "беркутаўца" паказаў. г.зн. падвойнага злачынцу, які адзначыўся і ва Украіне, і ў Беларусі.

А яшчэ тасуе сілавікоў з нябачанай раней хуткасцю. З-за падазронасці, з-за боязі змовы? Так, але не толькі: ён хоча як мага больш іх засвяціць.

Хто б ведаў цяперашніх міліцэйскіх начальнікаў на ранейшых пасадах? Можа, праціснуліся б ананімна, хоць бы як выканаўцы, а не кіраўнікі злачынных груповак. Але гаспадар не дазваляе.

Таму - сардэчна запрашаем у еўрапейскія і амерыканскія санкцыйныя спісы.

Толькі вось гэтыя санкцыйныя спісы пасля таго, пра што ішла гаворка ў пачатку, ужо становяцца спісамі абвінавачаных у злачынствах супраць чалавечнасці. А гэта ўжо іншы каленкор.

Можна пакпіць з "дурной" Еўропы, уводзіць абмежаванні на замежныя ваяжы карнікаў, але вось перакваліфікацыя з турыстаў, якія не адбыліся, у катэгорыю абвінавачаных, гэта ўжо сур'ёзна. Гэта ўжо надоўга, а для некаторых - назаўсёды. А яшчэ для некаторых распаўсюдзіцца на іх сем'і.

Фігуранты гэтых спісаў, якія так заўзята папаўняе галоўны стукач у Беларусі, Лукашэнка, чамусьці не задумваюцца, што яны выконваюць злачынныя загады. Не думаюць пра тое, што ўдзельнічаюць у карных дзеяннях незаконных, акупацыйных уладаў. Не думаюць, мабыць, што яны і ёсць самыя што ні на ёсць сапраўдныя злачынцы, якіх будуць судзіць паводле закону, які не залежыць ад сваволі дыктатара.

Але выйсце ёсць, калі ўключыць мінімум логікі на цвярозую галаву.

Спісы абвінавачаных сілавікоў - гэта такі своеасаблівы штрафны батальён людзей -адступнікаў закону, якія могуць самі сабе даць шанец рэабілітавацца.

На апошняй вайне, якую занадта добра памятаюць у Беларусі, некаторым крымінальнікам давалі шанец выправіць сваё жыццё. І яны гэтым шанцам карысталіся, змагаючыся з акупантамі. Сёння пра іх здымаюць фільмы і папулярныя серыялы, пішуць прыгодніцкія раманы.

Банальнасць зла, што распаўсюдзілася ў Беларусі перамагчы можна і нават не так складана. Для гэтага дастаткова, каб тыя, хто застаўся на службе дыктатуры перасталі падпарадкоўвацца злачынным загадам, уключылі мазгі і падумалі пра свае сем'і, у каго яны яшчэ засталіся.

Андрэй Саннікаў, «Фэйсбук»