«Камандзіра АМАПа Балабу байцы не любяць»

Сваю пастанову наконт яго вынесе суд новай Беларусі.

Камандзіра АМАПа Балабу байцы не любяць. Ужо гаварылася, што ён стаўленік Барсукова. У яго няма і ніколі не было ніякіх прынцыпаў, афіцэрскага гонару і разумення баявога братэрства. У такім калектыве гэта выкупаецца заўсёды на раз-два, піша тэлеграм-канал «Нік і Майк».

Значна больш павагі выклікае намеснік Балабы ў баявой падрыхтоўцы Тарасаў. І агулам АМАП выдыхнуў бы, калі б Балабу прыбралі. Адразу скажам, што Тарасаў таксама ва ўсім удзельнічаў і апраўдваць мы яго не маем намеру. Сваю пастанову наконт кожнага вынесе суд новай Беларусі.

Аб чалавечых якасцях Балабы кажа і тое, што ён кінуў жонку з двума дзецьмі і знайшоў сабе маладзейшую пасію. Асабліва адзначым, што новае жыццё Балаба пачаў ствараць, раскідаўшы старое. Для сустрэч з новай пасіяй камандзір АМАПу выгнаў з кватэры сына з жонкай і дзіцем, якія вымушаныя былі пераехаць да былой жонкі.

Адзін з супрацоўнікаў АМАП, які зараз служыць, даслаў у бот гісторыю пра Балабу, якая ператварылася ў анекдот. Мы праверылі праз некалькі крыніц і можам пацвердзіць: гісторыя мела месца быць.

Анекдот такі. Неяк беларускі АМАП быў на вучэннях у адной з суседніх краін - абменьваліся, так бы мовіць, досведам. Балаба на той момант быў камандзірам роты. Усе вучэнні ў сілавікоў заканчваюцца аднолькава - банкетам. Вядома, не без алкаголю. Балаба падлівае сабе, сваім калегам, якія сядзяць побач, і бае мясцовым пра баявых плыўцоў, пра надзвычай складаныя дэсантаванні, пра небывалую тактычную падрыхтоўку. Мясцовыя слухаюць, разявіўшы рот. Пасля банкета адзін з беларусаў, што сядзелі за сталом, спытаў у Балабы:

- Уладзіміравіч, ну хлусіце ж?

- Так, хлушу. Але для справы!

Разынка пра баявых плыўцоў дагэтуль у атрадзе ходзіць. Вось такі пярэсты берэт, які працягвае распавядаць небыліцы ўсюды, дзе з'яўляецца.