Гардон: Украіна павінна спыніць усе стасункі з Беларуссю пры рэжыме Лукашэнкі

Ніякага гандлю, ніякай амбасады, ніякіх палётаў.

Заснавальнік інтэрнэт-выдання "Гардон" Дзмітрый Гардон мяркуе, што Украіна павінна спыніць любыя кантакты з Беларуссю, у тым ліку разарваць дыпламатычныя стасункі. Такое меркаванне ён выказаў у эфіры праграмы "Права на Уладу" на тэлеканале "1+1" 27 траўня.

"Побач з намі жыве цудоўны беларускі народ. Выдатныя людзі! Добрыя, працавітыя, так пацярпелі падчас Другой сусветнай вайны (кожны чацвёрты беларус быў забіты)... Людзі гасцінныя, сардэчныя, сапраўдныя. Сёння гэты народ прыгнятацца сваім гестапа, таму што тое, што адбываецца ў Беларусі, – сапраўдны фашызм. Так ставіцца да сваіх людзей... Я не ведаю, хто так ставіцца ў XXI стагоддзі. Людзі выходзяць на мірны пратэст. Звярніце ўвагу: гэтыя чыстыя і прыстойныя людзі, паднімаючыся на лавачку, здымаюць абутак. Гэта сутнасць Беларусі, хрэстаматыйны прыклад на ўвесь свет. Яны выходзяць на мірны пратэст, яны не абралі Лукашэнку. Ён не прэзідэнт. Ён ніхто. Ён чалавек, які ўважае сябе за прэзідэнта. І што адбываецца ў адказ? Што робіць гэтая бяздушная, бязлітасная дзяржаўная машына? Яна збівае гэтых людзей, яна іх кідае ў вязніцы, яна іх гвалтуе... яна займаецца проста чалавеканенавісніцкімі рэчамі", – сказаў журналіст.

Ён абурыўся, што такое адбываецца ў XXI стагоддзі ў цэнтры Еўропы.

"Я разумею, пра што кажа [кіраўнік МЗС Украіны] Дзмітрый Кулеба. Для кожнай краіны прыярытэт – яе нацыянальныя інтарэсы. Толькі нацыянальныя інтарэсы дзяржавы павінны быць галоўнымі і вызначальнымі ў стасунках з іншымі краінамі. Разумеючы, што ў нас ёсць нашы інтарэсы, хачу сказаць, што вышэйшыя за ўсякія інтарэсы, на мой погляд, – чалавечыя інтарэсы. Я мяркую, што ніякіх стасункаў дзяржавы Украіны з Беларуссю, пакуль там кіруе рэжым Лукашэнкі, быць не можа. Ніякага гандлю, ніякай амбасады, ніякіх палётаў – нічога. Увогуле нічога!" – падкрэсліў журналіст.

Ён адзначыў, што перапыніць стасункі Украіна павінна не толькі з Беларуссю, але і з Расеяй, з якой знаходзіцца ў стане ваеннага канфлікту з 2014 года.

"Карыстаюся выпадкам, хачу сказаць, што на восьмым годзе вайны гандляваць з Расеяй таксама сорамна, амаральна і агідна. Таму, я мяркую, што наша дзяржава павінна спыніць усе стасункі з Расеяй, якія прадаўжаюцца да гэтага, і з Беларуссю. Усе стасункі! Нават на шкоду сабе. Мы не можам падтрымліваць чалавеканенавісніцкія рэжымы, якія забіваюць саму ідэю чалавечых стасункаў. Мы не можам падтрымліваць стасункі з людажэрамі. Мы не можам падтрымліваць стасункі з людзьмі, якія знішчаюць свой народ. Лукашэнка – класічны хлус. Проста ахранелы чалавек. Ну сорамна з такімі людзьмі падтрымліваць стасункі. Гэта супярэчыць агульначалавечым каштоўнасцям", – мяркуе журналіст.