«І авечкі ў нас не сталі пладзіцца і размнажацца»

Аналітык - пра эканамічную немач беларускіх уладаў.

Чаму мэта беларускіх уладаў выключае магчымасць развіцця краіны і залучэнне інвестыцый.

Экспэртка Аналітычнага цэнтра "Стратэгія" Вікторыя Васілевіч назвала паездкі найвышэйшых службовых асоб па прадпрыемствах краіны апошнім часам прапагандай, якая не мае нічога агульнага з рэчаіснасцю, і патлумачыла чаму.

- Грошай у краіне няма. Бюджэт у дэфіцыце павялічаны пастановай урада да 6 млрд рублёў, гэта значыць, сітуацыя зусім не радасная, і яны гэта разумеюць, прадбачліва нарошчваючы мінусы нашага бюджэту, - адзначыла экспэртка. - Ніводнае з прадпрыемстваў, якія наведваюцца, не будзе вырабляць прадукцыю, запатрабаваную на прылаўках. Нават тое самае дзіцячае харчаванне не будзе зроблена з тым складнікам якасць-кошт, якая дазволіць разбіраць яго з прылаўкаў.

Прадукцыя становіцца лепшай, калі ёсць з чым канкураваць. Выключэнне канкурэнцыі на паліцах крам прывядзе да таго, што кожны добры тавар, калі і з’явіцца, не будзе запатрабаваны.

Але можна меркаваць, што не з’явіцца, бо цэмент не з’явіўся, льняная прадукцыя не ўзнікла, шкло не ўзнікла, мармуровая ялавічына не з’явілася і авечкі ў нас не сталі пладзіцца і размнажацца.

У нас не працуюць ніякія абавязанні, падпісаныя на паперы не выконваюцца сапраўды гэтак жа, як і вусныя нейкія дамоўленасці, замацаваныя поціскамі рукі і гучнымі заявамі.

Усё гэта, на думку аналітыка, з'яўляецца перашкодай для паўнавартаснага развіцця эканомікі і краіны наогул.

- Я не бачу пакуль ніякіх перспектыў для развіцця краіны, бо я не бачу мэты развіваць нашу краіну, развіваць эканоміку для таго, каб падвышаць дабрабыт народа і нацыі.

У кожнай дзяржавы ёсць мэта. І гэтая мэта апраўдвае тыя сродкі, якія выкарыстоўвае дзяржаўная ўлада, выкарыстоўваючы разнастайныя спосабы для развіцця эканомікі. Гэта могуць быць інвестыцыі, найноўшыя тэхналогіі, нейкія выгоды для залучэння інвестараў, якія б дазволілі краіне зрабіць скачок наперад. У нас я не бачу такой мэты.

Мэта, якую агучваюць нам пастаянна, - нейкае бясконцае ўтрыманне ўлады пэўнымі людзьмі. І гэтая мэта выключае магчымасць развіцця краіны. І пакуль гэта так, нам складана будзе шукаць магчымасці для залучэння ўвогуле хоць нейкі замежнай дапамогі, - рэзюмавала Васілевіч.