Паўночная Карэя сутыкнулася з харчовым крызісам, але Кім Чэн Ын хоча «супрацьстаяць» ЗША

Аднак экспэрты мяркуюць, што Пхеньян можа пайсці на дыялог.

Паўночная Карэя, магчыма, сутыкнулася з «напружанай» харчовай сітуацыяй, выкліканай пандэміяй і леташнім тайфунам, але яе лідар Кім Чэн Ын хутчэй засяроджаны на супрацьстаянні адміністрацыі Байдэна, піша ibtimes.

Паводле звестак дзяржаўных СМІ, Кім падчас сустрэчы з кіроўнай Працоўнай партыяй у чацвер «правёў падрабязны аналіз» палітыкі адміністрацыі Байдэна ў дачыненні да Паўночнай Карэі, «прасвятліў адпаведныя стратэгічныя і тактычныя меры процідзеяння» і «падкрэсліў неабходнасць падрыхтоўкі як да дыялогу, так і да канфрантацыі» , - паведамляе The New York Times.

Гэта адбылося пасля таго, як у красавіку Белы дом абвясціў, што будзе трымацца «выверанага, практычнага падыходу, які адкрыты для дыпламатыі і будзе даследаваць яго» з Паўночнай Карэяй. Хоць падрабязнасці палітыкі Байдэна ў дачыненні да Паўночнай Карэі не выдаюцца, ёсць здагадкі, што Байдэн будзе шукаць «залатую сярэдзіну паміж прамымі сустрэчамі Трампа з Кімам і стратэгічным трываннем былога прэзідэнта Барака Абамы ў стрымліванні ядзернай праграмы КНДР», - паведамляе ABC News.

Раней на гэтым тыдні краіны «Вялікай сямёркі» (G7) таксама заклікалі да поўнай дэнуклеарызацыі Карэйскай паўвыспы, заклікаючы Поўнач адмовіцца ад сваёй ядзернай праграмы і вярнуцца да перамоў. У студзені Кім прыстрашыў пашырыць ядзерны арсенал краіны, калі Вашынгтон не зменіць сваю «варожую палітыку» ў дачыненні да Паўночнай Карэі.

Але аналітыкі, якія гутарылі з ABC News, не выключаюць, што Кім пачне перамовы. Са слоў Чэонг Сон-Чанга з прыватнага інстытута Сэджонга ў Паўднёвай Карэі, Кім «хутчэй за ўсё, вернецца да перамоў, але ён не прыме заклік да неадкладнай і поўнай дэнуклеарызацыі». Ён дадаў, што Кім можа пагадзіцца «скараціць свой ядзерны арсенал паэтапна, калі адміністрацыя Байдэна аслабіць санкцыі».

Некалькі аналітыкаў у Паўднёвай Карэі таксама мяркуюць, што харчовы крызіс можа падштурхнуць Кіма да дыялогу з мэтай атрымання замежнай дапамогі, паведамляе The New York Times.