Даследаванне паказала эфектыўнасць камбінацыі вакцын AstraZeneca і Pfizer

Змешаны графік прышчэпак дае добры імунны адказ.

Змешаны графік прышчэпак, у якім вакцына Pfizer ад COVID-19 уводзіцца праз чатыры тыдні пасля прышчэпкі AstraZeneca, дае добры імунны адказ. Вынік лепшы, чым увядзенне яшчэ адной дозы вакцыны AstraZeneca.

Пра гэта паведамляе агенцтва Reuters са спасылкай на оксфардскае даследаванне.

У даследаванні, названым Com-COV, параўноўваліся змешаныя двухдозавыя схемы вакцын Pfizer і AstraZeneca, і было выяўлена, што ў любой камбінацыі яны выпрацоўвалі высокія канцэнтрацыі антыцелаў супраць шыпавага бялку каранавіруса.

Гэтыя звесткі пацвярджаюць рашэнне некаторых еўрапейскіх краін, якія пачалі прапаноўваць альтэрнатывы AstraZeneca ў якасці другой прышчэпкі пасля таго, як вакцына была звязана з рэдкімі тромбамі.

Мэцью Снэйп, прафесар з Оксфарда, які стаіць за даследаваннем, сказаў, што атрыманыя звесткі можна выкарыстоўваць для надання гнуткасці разгортвання вакцыны, але яго недастаткова, каб рэкамендаваць больш шырокі адыход ад клінічна зацверджаных графікаў.

Самы высокі адказ антыцелаў назіраўся ў людзей, якія атрымлівалі дзве дозы вакцыны Pfizer. Абодва змешаныя рэжымы давалі лепшы адказ, чым дзве дозы вакцыны AstraZeneca.

Укол AstraZeneca, за якім рушыла ўслед Pfizer, выклікаў найлепшы Т-клеткавы адказ, а таксама больш высокі адказ антыцелаў, чым Pfizer, за якім ішла AstraZeneca.

Вынікі былі атрыманы для камбінацый вакцын, якія ўводзіліся з чатырохтыднёвым інтэрвалам 830 удзельнікам.