Сталі вядомыя падрабязнасці сур'ёзнага НЗ з дзецьмі ў Александрыі

Моцны вецер знёс батуты, на якіх знаходзіліся дзеці.

Сёння ў Александрыі адбылося сур'ёзнае НЗ. Як паведамляюцьzerkalo.io чытачы, моцны вецер знёс надзіманыя батуты, на якіх знаходзіліся дзеці.

- Усё здарылася літаральна за імгненне: падняўся моцны вецер і сарваў замацаваную надзіманую канструкцыю, дзе былі дзеці. Яны вельмі моцна спалохаліся, плакалі, - паведаміў Зміцер, які быў недалёка ад месца здарэння. - Побач былі вайскоўцы, яны кінуліся дапамагаць. Тут жа хуткія пад'ехалі - на такіх мерапрыемствах яны заўсёды ёсць.

Мужчына кажа, што загінулых няма. Медыкі павезлі дзяцей у шпіталь.

- Пасля здарэння на атракцыёнах у Александрыі па медыцынскую дапамогу звярнуліся пяць чалавек: двое дзяцей і трое дарослых, - паведамляе Міністэрства аховы здароўя. - Стан усіх пацыентаў прымальны, для удакладнення дыягназаў цяпер праводзіцца медыцынская дыягностыка. Дзяжурныя медыцынскія работнікі паведамляюць, што пагрозы іх жыццю няма.

Прычыны і абставіны высвятляюцца.

Нагадаем, падобнае здарэнне адбылося ў траўні 2015 года ў Горках (Магілёўская вобласць). Проста на вачах у бацькоў 7-метровая надзіманая горка-батут перакулілася. Дзевяць дзяцей трапілі ў лякарню з пераломамі і ўдарамі.

Пасля гэтага выпадку былі распрацаваныя і ўвайшлі ў дзеянне «Патрабаванні да эксплуатацыі абсталявання гульнявога надзіманага», зацверджаныя пастановай МНС. Сярод правілаў - наяўнасць не менш за шэсць кропак мацавання атракцыёну, якое вытрымлівае адпаведную нагрузку (калі іншае не прадугледжана вытворцам або дакументацыяй). Акрамя таго, правіламі забаронена эксплуатацыя атракцыёну пры неспрыяльных умовах надвор'я - у дождж, град або пры ветры хуткасцю больш за 10 метраў на секунду.