На мяжы Нямеччыны і Чэхіі праз паводку не ходзяць цягнікі

У адным з раёнаў Баварыі ўведзены рэжым НС.

Нямеччына прадаўжае адчуваць наступствы моцных ліўневых дажджоў. Выкліканая імі паводка прывяла да прыпынення чыгуначных злучэнняў паміж мястэчкам Бад-Шандау ў федэральнай зямлі Саксонія і чэшскім горадам Дзечыне. Прыпыненне сканчаецца не раней за поўдзень нядзелі, 18 ліпеня, паведаміў чыгуначны канцэрн Deutsche Bahn, падае dw.com.

Між тым у Баварыі, у раёне Берхтэсгадэнер-Ланд абвешчаны рэжым надзвычайнай сітуацыі. У выніку паводак загінуў прынамсі адзін чалавек. У населеных пунктах затопленыя сутарэнні многіх дамоў і вуліцы.

Значная частка мясцовых жыхароў эвакуяваная, паведаміла прадстаўніца раённай адміністрацыі. Узровень вады ў мясцовай рацэ падняўся да гістарычнай адзнакі 3,15 метра.

Праліўныя дажджы, якія абрынуліся на захад Нямеччыны 14-15 ліпеня, выклікалі моцную паводку. Колькасць ахвяр магутнай паводкі перавысіла 140 чалавек, улады папярэджваюць, што яна можа павялічыцца.

На дапамогу ў барацьбе з наступствамі стыхіі прыйшлі службоўцы ўзброеных сіл ФРГ. Прэзідэнт краіны Франк-Вальтэр Штайнмаер (Frank-Walter Steinmeier) заклікаў да салідарнасці ў дапамозе пацярпелым.