Беларускі дальнабойнік знёс гаўбец жылога дома ў прыгарадзе Турына, а італійцы яго накармілі і дапамаглі выехаць

Дапамога была цалкам прыватнай і бескарыслівай.

Малады кіроўца адной з літоўскіх фірмаў-вознікаў адчуў на сабе, што такое італійская гасціннасць, піша 1reg.by.

Ён разгрузіўся непадалёк ад Турына, а калі вяртаўся, пераблытаў дарогу і патрапіў у маленькі правінцыйны гарадок Манкука-Тарынэзэ.

У гэтым па нашых мерках пасёлку ў рэгіёне П'емонт, у правінцыі Асці пражываюць усяго 923 чалавекі. А вуліцы яго захавалі сярэднявечны каларыт. Яны вузкія і звілістыя і для вялікагруза прадставілі вялікую праблему.

У такой сітуацыі складана было нешта распачаць і кіроўца правым люстэркам і верхняй часткай кабіны Volvo FH зачапіў гаўбец жылога дома. Той, вядома, быў зруйнаваны дашчэнту.

Далей падзеі апісвае польскі рэсурс 40ton.net.

На месцы з'явіліся мясцовыя жыхары. Убачыўшы напалоханага і надломанага тым, што здарылася, кіроўцу, яны наважылі арганізаваць яму дапамогу. Пра акцыю абвясцілі на старонцы мясцовай супольнасці ў Facebook, дзе публікавалі фатаграфіі і нават падзякі ад мэра гарадка канкрэтных удзельнікаў.

Мясцовыя жыхары адшукалі перакладчыка і з яго дапамогай змаглі наладзіць кантакт з расейскамоўным кіроўцам. Таксама яны паклапаціліся аб арганізацыі дарожнага руху і дапамаглі грузавіку выбрацца з пасткі, - паведамляе выданне.

Акцыя разгарнулася маштабная, нехта з мясцовых прадпрымальнікаў даставіў грузавік з пад'ёмнікам і з яго заляплялі ізаляцыйнай стужкай пашкоджаную кабіну. Хтосьці падрыхтаваў для кіроўцы AdBlue. Італійцы прынеслі напоі, накармілі кіроўцу, які адышоў ад стрэсу, і прапанавалі яму скарыстацца прыбіральняй.

Адзначаецца, што да месца здарэння не выклікалі дзяржаўныя службы. Дапамога была цалкам прыватнай і бескарыслівай, таму жыхары заслугоўваюць вялікай павагі.