У ЗША і Вялікабрытаніі зафіксавалі маштабны збой у працы буйных вэбсайтаў

Ад Amazon да PlayStation.

Карыстальнікі інтэрнэту з ЗША і Вялікабрытаніі сутыкнуліся з праблемай - найбуйнейшыя інтэрнэт-крамы, стрымінгавыя платформы, банкі і серверы кампутарных гульняў перасталі працаваць.

Пра гэта паведамляе BBC.

Наведвальнікі, якія спрабавалі перайсці на некаторыя сайты, атрымлівалі памылкі DNS, гэта значыць іх запыты не маглі дасягнуць гэтых сайтаў.

Платформа маніторынгу адключэнняў інтэрнэту DownDetector паведамляла пра тысячы праблем сваіх карыстальнікаў на дзясятках папулярных сайтаў.

Папулярны пастаўшчык DNS, Akamai, паведаміў пра «новую праблему» са сваёй службай Edge DNS.

Праз некаторы час кампанія паведаміла, што праблема ліквідаваная і «служба аднаўляе нармальную працу».

The Independent паведамляе, што карыстальнікі скардзіліся на адключэнне Amazon, Steam, EA, гульні Call of Duty, стрымінгавага сэрвісу HBO Max. Не працавалі сайты Microsoft, McDonalds, Nvidia.

Акрамя гэтага, часова не працавалі сайты найбуйнейшых банкаў Захаду.

Прычына адключэння невядомая. Карыстальнікі паведамляюць, што сайты аднаўляюць сваю працу.