У кангрэсе ЗША ўхвалілі санкцыі супраць «Паўночнай плыні-2»

Таксама законапраект мае на ўвазе павелічэнне фінансавай дапамогі Украіне.

Палата прадстаўнікоў ЗША ўхваліла законапраект аб фінансаванні дзярждэпартамэнту ў 2022 годзе, паведаміў у Twitter журналіст Bloomberg Government Джэк Фітцпатрык, які асвятляе дзейнасць кангрэса, паведамляе РБК.

За прыняцце дакумента прагаласавалі 217 кангрэсменаў, супраць - 212. Законапраект сярод іншага мае на ўвазе ўвядзенне захадаў, якія павінны заблакаваць права прэзідэнта ЗША Джо Байдэна адмовіцца ад санкцый супраць расейскага газаправода «Паўночная плынь-2».

У пачатку месяца гэтую папраўку да законапраекта аб замежных выдатках федэральнага ўрада зацвердзіў камітэт асігнаванняў палаты прадстаўнікоў. Яе аўтарам стала кангрэсмен-дэмакратка ад штата Агаё Марсі Каптур. «Мы разлічваем, што адміністрацыя прэзідэнта пачуе наш сігнал і зробіць прыярытэтным пытаннем еўрапейскую энэргетычную бяспеку», - заявіла яна.

Каб забарона на адмену санкцый супраць «Паўночнай плыні-2» была зацверджаная, законапраект павінен адобрыць сенат, а затым падпісаць прэзідэнт.

Дакумент таксама мае на ўвазе павелічэнне фінансавай дапамогі Украіне. Як паведамілі ва ўкраінскім пасольстве ў ЗША, агульная сума субсідый складае не менш як $481,5 мільёнаў - гэта на $28,5 млн больш, чым сёлета. Кіраўнік офіса прэзідэнта Украіны Андрэй Ярмак заявіў, што значная частка сродкаў будзе накіраваная на ўмацаванне бяспекі і абараназдольнасці краіны.

У траўні ЗША ўвялі санкцыі супраць кампаніі «Мортранссэрвіс», ФДБУ «Марская выратавальная служба» і Самарскага цеплаэнэргетычнага маёмаснага фонду, якія звязаны з будаўніцтвам газаправода. Пад абмежаванні патрапілі таксама 13 расейскіх суднаў. Але Вашынгтон не стаў уводзіць санкцыі супраць аператара будаўніцтва трубаправода Nord Stream 2 AG і выканаўчага дырэктара гэтай кампаніі Матыяса Варніга. Са слоў Байдэна, прымяненне новых мер было б непрадуктыўным для стасункаў ЗША і Еўропы.