Беларускі лёгкаатлет рэзка выказаўся пра забарону спартоўцам выязджаць за мяжу

Андрэй Краўчанка мяркуе, што сістэма дэградуе.

Беларуская лёгкаатлетка Крысціна Ціманоўская, якая адмовілася вяртацца на радзіму пасля ціску на Алімпіядзе, заявіла, што беларускія ўлады забаранілі спартоўцам выязджаць на спаборніцтвы і нават на адпачынак за мяжу. Паводле яе слоў, афіцыйна такой забароны няма, але яе калегі скардзяцца, што атрымліваюць такія ўказанні.

Беларускі лёгкаатлет Андрэй Краўчанка, які таксама адмовіўся вяртацца ў Беларусь і застаўся ў Нямеччыне разам з жонкай, расказаў «Настоящему времени», што вядома пра новую забарону і як яна адаб'ецца на кар'еры беларускіх спартоўцаў.

- Як вы даведаліся аб забароне для беларускіх спартоўцаў выязджаць на спаборніцтвы за мяжу?

- Мне напісаў ананімны чалавек у інстаграме, паказаў перапіску, сказаў, што пра гэта неўзабаве ўсе даведаюцца. Я спачатку падумаў, што гэта нейкі ўкід, няправільная інфармацыя, і пачакаў трохі. І на наступны дзень мне адзін з маіх калегаў пацвердзіў інфармацыю, што ён хацеў выехаць на камерцыйны старт і яму сказалі: «Калі паедзеш, то толькі праз заяву на звальненне». Я зразумеў, што гэта не чуткі, што гэта праўда.

У мяне такое меркаванне, што, магчыма, гэта будзе нейкі часовы такі захад, бо 12 верасня будзе паўмарафон, дзе прысутнічацьме Лукашэнка. Наколькі я памятаю, гэта, напэўна, упершыню. І яны хочуць зрабіць проста прыгожую карцінку - сабраць усіх спартоўцаў, якія на кантракце, бо ім усё адно давядзецца ісці альбо звальняцца. Хочуць сабраць, напэўна, войска, МУС - усіх пазбіраць і зрабіць прыгожую карцінку. Магчыма, для гэтага хочуць, каб ніхто не выязджаў з краіны, каб усе былі на месцы.

- То бок, цяпер намечаныя нейкія камерцыйныя спаборніцтвы за мяжой - і для таго, каб вакол Лукашэнкі сабралася як мага больш спартоўцаў, гэтых спартоўцаў за мяжу не выпускаюць?

- Гэта адна з версій. Яшчэ адна версія, што не жадаюць, каб спартоўцы перанялі прыклад Крысціны Ціманоўскай і шукалі магчымасць трэніравацца і выступаць за іншыя нацыянальныя каманды.

- Гэта значыць, фактычна, улады Беларусі могуць баяцца, што беларускія спартоўцы будуць бегчы з краіны, калі выедуць за мяжу на спаборніцтвы, папросяць там палітычны прытулак?

- У кожным выпадку спартоўцы з'язджацьмуць, бо такое трываць - увесь час нешта круцяць, круцяць, муцяць. Вельмі цяжка будзе спартоўцам цяпер. Фінансаванне будзе ўразацца - будзе эканомія. Я не ведаю, што будзе далей.

- Многія спартыўныя аглядальнікі называюць выступленне беларускай нацыянальнай каманды на Алімпіядзе ў Токіё не самай удалай. Як вы думаеце, магчыма, палітычнае становішча ў краіне паўплывала на такі няўдалы алімпійскі вынік?

- Ды не, гэта ўжо сістэма ўся парушаная. Няма сістэмы падрыхтоўкі, усё будуецца на індывідуальных якасцях спартоўцаў, на таленце. Медалёў з кожнай Алімпіядай ўсё менш і менш. Таму пакуль не будзе нейкай нармальнай сістэмы развіцця спорту ў краіне, калі ў спорце будуць прысутнічаць людзі, якія менавіта спартоўцы, а не вайскоўцы, тады і будзе развіццё, тады можна будзе казаць пра добрыя выступы на спаборніцтвах і гэтак далей. А цяпер пакуль усё дэградуе.

- Вы ў жніўні выехалі з краіны. Магчыма, беларускай алімпійскай нацыянальнай камандзе не стае цяпер спартоўцаў праз тое, што яны бягуць з краіны?

- Не, гэта ўсё чыста ад сістэмы падрыхтоўкі. Трэнераў бракуе, усё сумна, напраўду. Палацаў набудавалі, а сістэмы няма. Таму як ёсць - так ёсць.

- Як склаўся лёс у беларускіх спартоўцаў, якія публічна выказалі нязгоду з вынікамі прэзідэнцкіх выбараў у Беларусі і павінны былі выехаць з краіны?

- Яны зазналі рэпрэсіі. Калі браць маю гісторыю - мяне звольнілі адусюль імгненна, нават не папярэдзілі пра гэта. Іншых спартоўцаў запалохвалі, да мяне прыязджалі з пагрозамі - шмат было ўсяго цікавага. І ў турме многія пасядзелі, і сядзяць шмат хто ў турме дагэтуль. Таму нічога добрага з гэтага не выйдзе.

- Вы выехалі з Беларусі. Вы цяпер разумееце ваш наступны лёс за мяжой?

- Мой далейшы лёс будзе залежаць толькі ад мяне. Я буду шукаць магчымасць тут трэніраваць людзей. Бо ў Беларусі я гэтага рабіць не магу, давядзецца трэніраваць дзяцей у Нямеччыне. Жонка, я думаю, прадоўжыць кар'еру тут у якім-небудзь нямецкім клубе.

- Гэта значыць, так ці інакш свой далейшы спартовы лёс спартоўцы, якія выязджаюць з Беларусі, за мяжой знаходзяць?

- Так.