«Ён бег, а ў сярэдзіне маршруту на яго быў учынены напад»

Паплечнік Віталя Шышова заявіў пра «паказальнае пакаранне» актывіста.

3 жніўня 2021 года ў Кіеве знойдзены павешаным кіраўнік «Беларускага дома ў Украіне» Віталь Шышоў. Ягонае цела знайшлі ў парку каля ЖК «Чайка» - гэта жылы комплекс на заходняй ўскраіне ўкраінскай сталіцы.

Цела Віталя Шышова разам з паліцыяй выявіў супрацоўнік «Беларускага дома ў Украіне» Юры Шучка.

«Я думаю, што ён, як звычайна, пайшоў на прабежку. Ён бег, у сярэдзіне маршруту на яго быў учынены напад, і быў прыведзены ў выкананне прысуд: чалавека павесілі», - сказаў ён у інтэрв'ю расейскай службе «Радыё ЛРТ».

Са слоў Шучкі, Віталь заўважаў за сабой сачэнне - падазроныя машыны і падазроных людзей, якія з'яўляліся там жа, дзе знаходзіўся Віталь.

«Адзін раз яго сяброўка заўважыла, што яе здымаюць на камеры два чалавекі, якія прадставіліся беларусамі. Такія моманты былі на працягу паўгода прыкладна. А ўчора ў размове праз тэлефон ён сказаў: «Прыгледзь за Бажэнай (сяброўка Шышова - рэд), у мяне дрэннае прадчуванне», - распавёў Юры Шачка.

Паводле ягоных слоў, цяпер праваахоўныя органы краіны вядуць расследаванне, але ўсё будзе залежаць ад «палітычнага вагара».

«Наша арганізацыя будзе працаваць так, як працавала. Віталь - наш намінальны дырэктар, на яго было завязана шмат медыйных сувязяў, але гэта не касуе таго, што мы павінны працягваць сваю працу, нягледзячы ні на што, як сябе адчувае калектыў. Я не ведаю, а я сябе адчуваю, як японскі самурай. Я таксама быў папярэджаны, як і яшчэ пару актывістаў «Беларускага дома ва Украіне», пра магчымасць фізічнай ліквідацыі», - сказаў у інтэрв'ю расейскай службе Радыё ЛРТ Шучка.

«Я думаю, што гэта было паказальная пакаранне», - дадаў ён.

Віталь Шышоў узначальваў «Беларускі дом ва Украіне» - некамерцыйную арганізацыю, якая дапамагала беларусам, якія з'ехалі з краіны з палітычных прычын, з легалізацыяй, жыллём і працаўладкаваннем у суседняй краіне. Шышоў быў адміністратарам некалькіх Telegram-каналаў, прызнаных у Беларусі экстрэмісцкімі.

Прадстаўнікі БДУ сустракаліся з дэпутатамі Вярхоўнай рады Украіны, абмяркоўвалі магчымыя санкцыі ў дачыненні да Беларусі, займаліся зборам подпісаў.

Пераехаць у Кіеў Віталь, жыхар беларускага горада Рэчыца, быў вымушаны восенню 2020 года, калі ў Беларусі пачаліся масавыя акцыі пратэсту супраць фальсіфікацыі вынікаў прэзідэнцкіх выбараў - у адказ на іх рэжым Аляксандра Лукашэнкі разгарнуў кампанію рэпрэсій.

«У БДУ ён браўся абсалютна за ўсе сферы дзейнасці: дапамога пераехаўшым людзям, правядзенне акцый супраць рэжыму Лукашэнкі, звароты ў дзяржаўныя органы для прасоўвання законапраектаў, якія дапамагаюць нашым суайчыннікам, фармаванне дыяспары ва Украіне. За Віталікам вялося сачэнне. Пра факты былі адпаведныя паведамленні паліцыі. Таксама нас неаднаразова папярэджвалі як мясцовыя крыніцы, так і свае людзі ў Беларусі аб разнастайных правакацыях - аж да выкрадання і ліквідацыі. Віталь стаічна і з гумарам ставіўся да гэтых папярэджанняў, заяўляючы, што хоць так, магчыма, БДУ выйдзе з інфармацыйнага вакууму. Няма сумненняў, што гэта спланаваная чэкістамі аперацыя ліквідацыі сапраўды небяспечнага рэжыму беларускага грамадзяніна», - заяўляюць прадстаўнікі БДУ.

Сяброўка Віталя - Бажэна Жолуд, таксама родам з Рэчыцы, распавяла журналістам беларускай рэдакцыі «Радыё Свабода» пра яго наступнае:

«У Віталя не было бацькоў і сям'і - усе памерлі. Ён працаваў праграмістам-фрылансерам. Ён ніколі не скардзіўся на тое, што за ім сочаць. Але апошнім часам Віталь стаў больш уважлівым - здаралася, глядзеў, што за аўтамабілі пад'ехалі, хто з іх выходзіць. Адкрытых пагроз яму не было, але ў яго было благое прадчуванне. Мне ён пра гэта не казаў, але аднаму нашаму знаёмаму пісаў за тыдзень да трагедыі: у мяне дрэннае прадчуванне, калі што, паклапаціся пра Бэжэну. Каб канкрэтна незнаёмыя людзі падыходзілі да Віталя - такога не было. Да мяне аднойчы ў цэнтры горада падышлі нейкія людзі - як потым высветлілася, запісвалі і здымалі».