У Гародні з аўкцыёну прадаюць казармы пачатку XX стагоддзя
9- 23.09.2021, 17:03
- 4,576
Гістарычныя будынкі нельга зносіць, але можна рэканструяваць.
Дзве казармы, пабудаваныя ў 1914 годзе, выстаўленыя на таргі ў Гародні, паведамляе Гарадзенскі цэнтр нерухомасці.
Гістарычныя будынкі нельга зносіць, але можна рэканструяваць, да прыкладу, пад шматкватэрны дом.
Пачатковы кошт адной - 1 404 064 рублі 75 капеек. Другой - 1 220 150 рублёў. Да казармаў прымыкаюць зямельныя надзелы, якія здаюцца ў арэнду на 25 гадоў.
Паводле ўмоў аўкцыёну, пакупніку трэба будзе цягам двух гадоў распрацаваць праектную дакументацыю для рэканструкцыі (або капітальнага рамонту) казармаў, і цягам трох гадоў з моманту пакупкі гэтую рэканструкцыю правесці.
Забаронена змяняць архітэктуру фасада «неабгрунтавана». Праўда, дакумент не ўдакладняе, што можа служыць падставай. Акрамя гэтага, новаму ўладальніку адной з казармаў трэба будзе пабудаваць паркан паміж будынкам і тэрыторыяй вайсковай часткі №7404 унутраных войскаў МУС.
Аўкцыён правядуць 20 кастрычніка, заяўкі трэба паспець падаць да 14 кастрычніка.