Прадпрымальнікі будуць выплачваць адзіны падатак па-новаму ўжо з 1 лютага

Набылі моц нямала сур'ёзных змен у Падатковым кодэксе.

З 1 студзеня ўвайшло ў дзеянне нямала сур'ёзных змен у Падатковым кодэксе, але дагэтуль шмат застаецца незразумелым і тлумачыцца па ходзе справы, піша «Онлайнер».

Цяпер інспекцыя Міністэрства падаткаў і збораў па г. Менску патлумачыла, што прадпрымальнікі будуць выплачваць адзіны падатак паводле новых ставак з 1 лютага 2022 года.

«Калі прадпрымальнік з 2022 года патрапіў пад абмежаванні, ён абавязаны будзе перайсці альбо на выплату падаходнага падатку, альбо на выплату адзінага падатку, калі тып яго дзейнасці ў адпаведнасці з 33-м кіраўніком Падатковага кодэкса дазваляе гэта рабіць. Адзіны падатак - так, адбылося павелічэнне ставак. Стаўкі штогод індэксуюцца, і змены 2022 - не выключэнне. Прадпрымальнікі будуць выплачваць падатак паводле новых ставак з 1 лютага 2022 года. Студзень яшчэ для вывучэння, адаптацыі, магчымасці змены сістэмы падаткаабкладання», - паведаміла намесніца начальніка інспекцыі Вольга Тарасевіч.

Каб перайсці на адзіны падатак, трэба падаць падатковаму інспектару адпаведную дэкларацыю. Той зменіць сістэму падаткаабкладання, а прадпрымальнік будзе ведаць прыкладную суму, якую давядзецца аддаць за год.

Прадпрымальнікам, якія заплацілі да 1 студзеня паводле старых расцэнак, даплачваць не давядзецца, удакладнілі ў МПЗ.