«Пуцін у бункеры, таму што баіцца вашага прасвятлення»

Рэзнікаў звярнуўся да расейскіх афіцэраў.

Міністр абароны Украіны Аляксей Рэзнікаў заклікаў расейскіх афіцэраў апамятацца і не страціць час, калі яны яшчэ могуць выратаваць Расею ад трагедыі, а расейскае войска – ад прыніжэння.

Ён падкрэсліў, што расейскія кіроўныя вярхі падманулі і здрадзілі ім і што расейскіх вайскоўцаў выпраўляюць на вайну супраць Украіны, каб яны паміралі за ілюзорныя мэты расейскага дыктатара Уладзіміра Пуціна. Адпаведны відэазварот кіраўніка Мінабароны Украіны з'явіўся ў пятніцу, 7 кастрычніка – у дзень 70-годдзя Пуціна.

«Вашыя дэсантнікі зараз гінуць на правым беразе Дняпра. Яны ведаюць сваю справу. Але нехта ў Крамлі надумаў выправіць іх на верную смерць. Вас падманулі, вам здрадзілі. Вам абяцалі лёгкі шпацыр, а выправілі ў пастку. Вы плаціце крывёй за нечыя фантазіі і лжывыя мэты», – заявіў Рэзнікаў.

Рэзнікаў падкрэсліў, што звяртаецца да расейскіх вайскоўцаў, бо менавіта ім трэба прымаць пастанову.

Ён звярнуў увагу, што расейскія ўлады цяпер перасталі слухаць афіцэраў сваёй арміі. Бо гэта будзе азначаць, што яны прызнаюць свае памылкі, а ў Крамлі не любяць праўду.

«Ім прасцей расказаць, як вы гераічна загінулі ў бітве з выдуманымі полчышчамі NATO», – кажа Рэзнікаў.

«Пуцін у бункеры, таму што баіцца вашага прасвятлення»

Таксама Рэзнікаў звярнуў увагу расейскіх афіцэраў на тое, чаму іх «лідар» хаваецца ў бункеры, а не трымае ўдар побач з імі. Ён падкрэсліў, што гэта менавіта таму, што расейскіх ваякаў выправілі паміраць не за добрую справу, і цяпер Пуцін баіцца іх прасвятлення і помсты.

Рэзнікаў акрэсліў будучыню акупантаў: яны ўвойдуць у гісторыю як зладзеі, гвалтаўнікі і забойцы. Але і гэта не самае горшае, бо многія з іх загінуць ці будуць мець інваліднасць на ўсё жыццё.

«Я вам скажу, што будзе далей. Тысячы расейскіх хлопцаў загінуць. Яшчэ больш застанецца без рук, без ног. Але іх зганьбяць. А вас зробяць вінаватымі. І вам зноў здрадзяць. Як ужо здраджвалі не раз», – заявіў Рэзнікаў.

Украіна гарантуе бяспеку тым, хто адмовіцца ваяваць

Наша дзяржава гарантуе жыццё, бяспеку і справядлівасць усім, хто адмовіцца ваяваць неадкладна, падкрэсліў міністр абароны Украіны. Аднак часу, калі можна хоць нешта выправіць, ужо вельмі мала, дадаў ён.

«Мы гарантуем жыццё, бяспеку і справядлівасць усім, хто адмовіцца ваяваць неадкладна. І мы дасягнем трыбуналу для тых, хто аддаваў злачынныя загады. Вы яшчэ можаце выратаваць Расею ад трагедыі, а расейскае войска – ад прыніжэння. Але час праходзіць. Не прапусціце яго», – падсумаваў Рэзнікаў.