Кіеў ініцыяваў працэс выключэння РФ з ААН і Рады бяспекі ААН

На думку Украіны, РФ «акупавала месца СССР» у Радзе Бяспекі.

Украіна ініцыявала працэс, накіраваны на выключэнне Расеі з Рады Бяспекі ААН і арганізацыі ў цэлым, паведаміў міністр замежных спраў Украіны Дмытро Кулеба ў панядзелак, 26 снежня.

«Мы заявілі на афіцыйным узроўні сваю падрабязную і аргументаваную пазіцыю, чаму знаходжанне Расеі ў Радзе Бяспекі ААН і ў арганізацыі - нелегітымнае. Мы падалі дэталёвыя довады таго, як 31 год таму расейская дэлегацыя фактычна проста акупавала крэсла СССР у Радзе Бяспекі ААН - дзяржавы, якая на той момант спыніла сваё існаванне - без якіх-небудзь статутных падстаў для гэтага», - цытуе дыпламата ўкраінскае інфармагенцтва УНИАН.

На думку Кулебы, перадача Расеі месца СССР у Радзе Бяспекі ААН стала "грубым парушэннем пункта 2 артыкула 4 Статута ААН, які дакладна вызначае адзіную легітымную працэдуру набыцця сяброўства ў Арганізацыі".

«Вайна Расейскай Федэрацыі супраць Украіны - беспрэцэдэнтны акт парушэння мэт і прынцыпаў Статута ААН з часоў яго падпісання ў 1945 годзе і пазбаўляе Расею права называцца міралюбнай дзяржавай», - гаворыцца ў заяве, апублікаванай 26 снежня на сайце МЗС Украіны.

З гэтага дакумента вынікае, што, з пункту гледжання Кіева, Расея злоўжывае сваім правам вета ў Радзе Бяспекі ААН. У якасці прыкладу такіх злоўжыванняў названыя ў тым ліку блакаванне РФ рэзалюцыі аб стварэнні трыбунала ў расследаванні справы аб катастрофе рэйса MH17 "Малайзійскіх авіяліній"; аб прызнанні масавых забойстваў у Срэбраніцы генацыдам, аб рэагаванні на палітычную і гуманітарную сітуацыю ў Вэнэсуэле; аб узмацненні санкцыйнага рэжыму ў дачыненні да КНДР, а таксама 16 рэзалюцый што да Сірыі.

Заклік Зяленскага выключыць РФ з Рады бяспекі ААН

Даўней, у верасні, прэзідэнт Украіны Уладзімір Зяленскі таксама заклікаў міжнародную супольнасць пазбавіць Расею сталага сяброўста ў Радзе Бяспекі ААН і выключыць яе з усіх міжнародных арганізацый.

Выступаючы на пасяджэнні Генеральнай Асамблеі ААН 27 верасня, прэзідэнт Украіны назваў пяць прыкладаў магчымага парушэння Масквой міжнароднага правапарадку і права, у тым ліку ядзерны шантаж.

На экстранным пасяджэнні Радзе Бяспекі ААН аб Украіне 24 лістапада, скліканым на просьбу Кіева, Уладзімір Зяленскі заклікаў пазбавіць Расею права галасаваць у Радзе Бяспекі ААН і накладаць вета на пастанову Рады бяспекі. Ён падкрэсліў, што «дзяржава-тэрарыст» (днём раней Еўрапарламент прызнаў РФ дзяржавай - фундатарам тэрарызму) не мае права ўдзельнічаць ні ў якіх галасаваннях, якія тычацца яе «агрэсіі і тэрору».

Як заявіла 15 снежня прэсавая сакратарка Белага дома Карын Жан-П'ер, ЗША хацелі б дамагчыся выключэння Расеі з ліку сталых сябраў Рады бяспекі ААН, аднак на гэты момант не бачаць такой магчымасці, таму будуць далей дамагацца ізаляцыі Масквы на міжнародных пляцоўках.