БЧ запускае навагодні экспрэс у Белавежскую пушчу

Але кошты кусаюцца.

Турыстычны цэнтр Беларускай чыгункі запускае традыцыйны праект «Падарожжа ў Маёнтак Дзеда Марозу» ў Нацыянальны парк «Белавежская пушча», паведамляе прэс-служба прадпрыемства.

Першы навагодні цягнік адправіцца са станцыі Менск-Пасажырскі 9 снежня 2022 года а 21:58 і прыбудзе ў Берасце раніцай наступнага дня а 07:50. Потым пасажыраў перасадзяць у аўтобусы і ў суправаджэнні экскурсаводаў павязуць у Белавежскую пушчу.

Там госці правядуць цэлы дзень. Падарожнікаў чакае насычаная навагодняя экскурсійная праграма: яны наведаюць Маёнтак беларускага Дзеда Марозу, домік Снягуркі, Чароўны Млын, пабываюць на алеі знакаў Усходняга Календара, у музеі падарункаў Дзеда Марозу, загадаюць свае самыя патаемныя жаданні на паляне Дванаццаці Месяцаў. Можна будзе павадзіць карагод ля галоўнай пушчанскай ялінкі. У праграму тура таксама ўваходзіць знаёмства з музеем прыроды, шпацыр уздоўж вальераў з жывёламі і пачастунак блінамі з гарбатай на пушчанскай траве.

З Берасця навагодні цягнік адправіцца 10 снежня 2022 года а 17.28 і прыбудзе ў Менск а 22.20. Удзельнікі тура з паездкі вернуцца ў Менск на тым самым цягніку і на тых жа месцах, на якіх адправіліся ў падарожжа. Акрамя таго, на зваротным шляху ў Менск турыстаў чакае ў цягніку сустрэча з чыгуначным Дзедам Марозам і яго памагатым, і анімацыйная праграма.

Такую паездку можна будзе здзейсніць кожныя выходныя аж да 13 студзеня. Па пятніцах поезд будзе адпраўляцца з Менска а 21.56 і прыбываць у Берасце а 7.50, назад адпраўленне ў суботу а 17.56 і прыбыццё ў сталіцу а 22.21. Выключэннем стане толькі навагодні ўікэнд: 30 снежня рэйса не будзе. Замест гэтага цягнік запусцяць у сераду 4 студзеня.

Кошты экскурсіі немаленькія:

- дарослым - 160 рублёў;

- дзецям да 6 гадоў - 116 рублёў (для дзяцей, малодшых за два гады, экскурсія не рэкамендаваная);

- дзецям 6-9 гадоў - 125,76 рубля;

- дзецям 10-14 гадоў - 152 рублі.