Навукоўцы высветлілі, як кава ўплывае на страваванне

Вынік даследаванняў здзівіў адмыслоўцаў.

Агляд амаль двухсот навуковых публікацый паказаў, што сярэдняе спажыванне кавы - тры-пяць кубкаў штодзень - не шкодзіць стрававальнай сістэме, а наадварот, зніжае рызыку ўтварэння камянёў у жоўцевым пухіры, панкрэатыту і некаторых захворванняў пячонкі. Вынікі даследавання апублікаваны ў часопісе Nutrients.

На сваім шляху праз страўнікава-кішачны тракт кава робіць тры асноўныя ўздзеянні: на страўнікавую, жоўцевую і панкрэатычную сакрэцыю, неабходную для ператраўлення ежы, на мікрабіёту кішачніка і на перыстальтыку - скарачэнне сценак тоўстай кішкі, працэс, неабходны для праходжання ежы праз стрававальны тракт.

Аналіз вынікаў 194 даследаванняў паказаў, што кава пры сярэднім спажыванні стымулюе працэсы стрававання і дапамагае праходжанню праз тоўстую кішку, павялічвае колькасць "добрых бактэрый" у кішачніку, зніжае рызыку ўтварэння жоўцевых камянёў, а таксама робіць ахоўнае дзеянне на пячонку, у тым ліку ад злаякасных утварэнняў, як напрыклад гепатацэлюлярная карцынома - адзін з найбольш распаўсюджаных тыпаў раку пячонкі.

"Насуперак некаторым меркаванням, спажыванне кавы ў цэлым не звязанае з праблемамі кішачніка або стрававання, – падаюцца ў прэсавым рэлізе аб каве французскага Інстытута навуковай інфармацыі (ISIC) словы аўтара агляду доктаркі Астрыд Нэліг (Astrid Nehlig), ганаровай дырэктаркі даследаванняў Французскага нацыянальнага інстытута аховы здароўя і медыцынскіх даследаванняў (INSERM). У некаторых выпадках кава дапамагае супраць распаўсюджаных скаргаў на страваванне. Новыя звесткі таксама паказваюць на тое, што спажыванне кавы спрыяе павышэнню ўзроўню станоўчых кішачных бактэрыяльных груп, такіх як біфідабактэрыі".