Экс-амбасадар Украіны ў Беларусі: Расейцы ставілі мяне да сценкі і хацелі расстраляць
6- 16.05.2022, 12:06
- 15,506
Раман Бяссмертны расказаў аб жахах акупацыі вёскі Матыжын.
Падчас акупацыі населеных пунктаў Кіеўскай вобласці расейскія вайскоўцы пад пагрозай расстрэлу спрабавалі высветліць, хто ў вёсцы Матыжын з'яўляецца "царом". Пры гэтым рашысты на поўным сур'ёзе шукалі чалавека, які "трымае" населены пункт.
Захопнікі з РФ здзекаваліся з людзей, ставілі іх да сцяны і ладзілі допыт пад руляй аўтамата. Пра гэта ў інтэрв'ю censor.net расказаў украінскі палітык, былы амбасадар Украіны ў Беларусі Раман Бяссмертны.
Паводле ягоных слоў, з акупантамі перад уварваннем ва Украіну больш працавалі ў інфармацыйным плане, чым з пункту гледжання баявой і тактычнай падрыхтоўкі.
"Той, хто з імі размаўляў, скажа, што яны вельмі добра падрыхтаваны ў інфармацыйным плане. І гэта не тое, што іх палітрукі інструктавалі. Гэта СМІ, якое іх атакавала, і ў галаве ў іх утварылася лухта. Вось яны мяне ставілі да сценкі расстрэльваць і патрабавалі сказаць, хто "ў вёсцы цар", - распавядае Бяссмертны.
Характэрна, што акупанты сапраўды спрабавалі знайсці ў Матыжыне так званага "гаспадара". Аднак Бяссмертны спрабаваў ім растлумачыць, што ва Украіне няма "цара" і людзі жывуць роўным жыццём.
“Яны трапілі ў сістэму каардынат, дзе няма цара і падначаленага. Але яны не разумелі і перлі, перлі на мяне. Тады кажу: “Вы не разумееце, што тут адно аднаго паслаць могуць?” Вось у такіх выпадках было бачна, наколькі мы розныя. "І трэба было дакапацца, што яны ўкладваюць у гэтыя рэчы. Таму што я потым спытаў сваіх, а хто ў нас тут цар, і мне ўсё назвалі розных людзей", - адзначыў Бяссмертны.