Работнікаў «Беларуськалію» адпраўляюць у прастой

Жанчынам прапануюць ехаць працаваць у дзіцячы санаторый «Дубрава».

Як паведамляе страйкам салігорскага прадпрыемства, на ААТ «Беларуськалій» быў падпісаны загад нумар 315 ад 25.04.2022 аб прыпыненні вытворчасці ў сувязі са значным зніжэннем збыту прадукцыі.

Проста цяпер многіх людзей адправілі і адпраўляюць у прастой на 7-15 дзён з аплатай 2/3 ад іх тарыфу/акладу. Жанчынам прапануюць ехаць працаваць у дзіцячы санаторый «Дубрава» на летні сезон 2022.

У сувязі са сталымі прыпыненнямі працоўнага працэсу працаўнікі сталі атрымліваць замест звыклых заробкаў проста капейкі, якіх шмат каму не выстарчыць на выплату крэдытаў.

Паводле папярэдніх ацэнак, збыт прадукцыі ў 2022 годзе складае не больш за 15-20% ад папярэдняга сярэднегадавога аб'ёму, паведамляе Telegram-канал беларускіх рабочых «БАР».