Уступная кампанія ў Беларусі налета сур'ёзна зменіцца

Што чакае абітурыентаў.

Начальнік галоўнай управы прафесійнай адукацыі Мінадукацыі Сяргей Каспяровіч падчас семінара «Новае ў правілах прыёму ў вышэйшыя і сярэднія спецыяльныя ўстановы адукацыі» распавёў аб зменах ва ўступнай кампаніі 2023 года, паведамляе карэспандэнт агенцтва «Минск-Новости».

Новыя правілы прыёму

Адной з ключавых зменаў стане ўвядзенне ў школах цэнтралізаванага іспыту (ЦІ), паводле вынікаў якога выпускнікі змогуць паступіць у ВНУ.

Правядзенне іспыту, са слоў начальніка галоўнай управы, будзе падобнае на здачу цэнтралізаванага тэставання. Аднак сам ЦІ трэба ўспрымаць менавіта як выпускны іспыт па матэматыцы і расейскай/беларускай мове (на выбар школьніка).

Вынікі ЦІ будуць улічвацца пры фармаванні сярэдняга бала атэстата ў адпаведных прадметах. Акрамя таго, пасля здачы іспыту школьнікі змогуць атрымаць сертыфікаты са сваімі баламі - яны спатрэбяцца для паступлення.

Пасля здачы школьнага іспыту выпускнік таксама зможа здаць цэнтралізаванае тэставанне, але толькі па іншых прадметах (фізіка, хімія, біялогія і інш.). Такім чынам, пры падачы дакументаў на выбраную спецыяльнасць у яго будзе набор сертыфікатаў ЦТ і ЦІ.

Дзейнічаць сертыфікаты будуць 2 гады.

Новаўвядзенне, удакладніў С. Каспяровіч, не закране выпускнікоў ССНУ: яны, калі захочуць прадоўжыць навучанне, павінны будуць здаваць цэнтралізаванае тэставанне, у тым ліку па расейскай/беларускай мове і пры неабходнасці матэматыцы.

Начальнік галоўнай управы таксама дадаў, што ў 2023 годзе выпускнікі школ не змогуць здаць ЦТ па прадметах ЦІ (матэматыка і адна з дзяржаўных моў), але ў 2024-м, калі гэта будзе неабходна для падачы дакументаў у ВНУ, такая магчымасць у іх з'явіцца.

Мэтавая падрыхтоўка

У наступным годзе зменяцца і асобныя нормы, звязаныя з мэтавай падрыхтоўкай. Так, павялічацца адсоткавыя квоты набору такіх спецыялістаў: у медыцынскіх спецыяльнасцях пад мэтавікоў будуць аддаваць да 80% бюджэтных месцаў, у сельскагаспадарчых спецыяльнасцях - да 70%, па астатніх прафесіях - да 60%.

Таксама зменіцца парадак прыёму на мэтавую форму атрымання адукацыі. У прыёмную камісію больш не трэба будзе падаваць сертыфікаты ЦТ, замест іх увядуць здачу ўнутранага ўступнага іспыту па адным з профільных прадметаў. І вядома, трэба паказаць атэстат.

Ільготы для пераможцаў універсітэцкіх алімпіяд

У адпаведнасці з новымі нормамі асобныя ВНУ змогуць праводзіць універсітэцкія алімпіяды ў некаторых прадметах і спецыяльнасцях - іх пералік вызначыць Міністэрства адукацыі.

Як распавёў С. Каспяровіч, заданні на такіх алімпіядах будуць знаходзіцца «ў рэчышчы школьных прадметаў», але з уключэннем творчых або звязаных са спецыфікай ВНУ элементаў.

Пераможцы ўніверсітэцкіх алімпіяд без уступных іспытаў змогуць паступіць у ВНУ, якая праводзіла спаборніцтвы, на асобныя спецыяльнасці (іх спіс таксама сфармуюць загадзя).

Што яшчэ зменіцца

У 2023 годзе на завочную бюджэтную форму атрымання адукацыі стануць прымаць толькі абітурыентаў з 10-месячным стажам працы. Акрамя таго, выпускнікі Нацыянальнага дзіцячага тэхнапарку пры наяўнасці рэкамендацый наглядальнай рады ўстановы змогуць паступіць па выніках сумоўя, без здачы ЦТ, на тэхніка-тэхналагічныя навуковыя спецыяльнасці ў адпаведныя ВНУ.

Новыя правілы паступлення ў каледжы

З 2023 года конкурс на ўсе спецыяльнасці, у тым ліку тыя, што былі запатрабаваныя летась (на адно месца прэтэндавалі не менш як тры чалавекі), будзе фармавацца паводле сярэдняга балу атэстата. Такім чынам, падаваць сертыфікаты аб здачы ЦТ абітурыенту не трэба.