Беларуска прыдумала рыэлтарскую «схему» і прысвоіла амаль мільён даляраў

Грошы марнаваліся на набыццё ювелірных вырабаў і прадметаў мастацтва.

Зарабіць $800 000 у наш час – нялёгкая задача. Людзі могуць гадамі ісці да мэты, але так і не дасягнуць яе. Зрэшты, калі паступаць не зусім паводле закона, дарога да запаветнага мільёна станецца карацейшай. (Але і да магчымасці жыць на волі ўзнікнуць пытанні.) Аб дзіўным ператварэнні заснавальніка агенцтва нерухомасці і па сумяшчальніцтве рыэлтара ў падазраваную ў махлярстве ў асабліва значнай суме на днях распавяла міліцыя.

Угода з задаткам

«Устаноўлена, што жанчына пад рознымі падставамі выманьвала ў кліентаў і знаёмых значныя сумы. За пяць гадоў яна завалодала грашыма 17 чалавек на агульную суму, большую за 730 тысяч даляраў і 50 тысяч еўраў. Напрыклад, аднаму з пацярпелых жанчына не вярнула 215 тысяч даляраў, узятых пад адсоткі. Праводзяцца далейшыя аператыўныя мерапрыемствы і следчыя дзеянні. Колькасць пацярпелых і сума шкоды можа вырасці», - суха паведамілі ў ГУУС.

А вось як гэтыя «мерапрыемствы па перацяканні грошай з адной кішэні ў іншую» адбываліся ў жыцці. Адзін з пацярпелых падзяліўся з Onlíner сваёй гісторыяй.

Агенцтва, якое прадстаўляла цяперашняя фігурантка крымінальнай справы, існуе яшчэ з 90-х, спецыялізуецца на продажы элітнай нерухомасці і, увогуле, нідзе і нічым сябе не запляміла. Мы наўмысна не агучваем назву арганізацыі, бо агенцтва прадаўжае працаваць і выконвае свае абавязацельствы перад кліентамі, уся праблема толькі ў адным чалавеку.

У нейкі момант імя заснавальніцы арганізацыі, дзелавой і актыўнай дзяўчыны, стала асобным брэндам, і, адчуўшы перавагі, якія дае такая опцыя, мянчанка пачала весці справы «па-свойму».

- Летась я ўклаў дамову на куплю кватэры з вядомым агенцтвам нерухомасці, - распавядае Міхась. - Як і належыць, унёс задатак - 10 000 еўраў, маю ўгоду курыравала асабіста Валерыя Х. Калі трэба было разлічвацца за жыллё, я аддаў прадаўцу поўную суму, без уліку тых 10 000 еўраў, каб не канвертаваць іх лішні раз. Натуральна, быў упэўнены, што пасярэднік верне мне задатак адразу ж - угода ж адбылася...

Грошы на прыгожае жыццё

Але, як ужо можна было здагадацца, працэс вяртання грошай гаспадару выявіўся няпростым. На Міхася, які паднімаў пытанне, штораз сыпаліся новыя адгаворкі: выканаць абавязанні мяшаў ковід, адпачынак, згублены ключ. Затым офіс і зусім нібы «абнеслі» (прынамсі, з сейфа, па словах Валерыі, грошы зніклі).

- Безумоўна, было зразумела: нешта пайшло не так. Тады я наважыў звярнуцца ў міліцыю, але ў адказ пачуў: ідзіце ў суд, гэта грамадзянска-прававыя дачыненні. Бо на той момант ніхто больш заявы не падаваў, гэта сапраўды не выглядала як махлярства. Ад Мінюсту, куды я таксама падаў скаргу, адказу не атрымаў (хаця пазней, наколькі мне ўдалося даведацца, яе пазбавілі ліцэнзіі).

Шляхам доўгіх размоваў мне ўсё ж удалося вярнуць 8500 еўраў. 1500 яна так і засталася віннай. Але ад свайго адваката я ведаю, што пацярпелых куды болей: людзі таксама сталі звяртацца ў міліцыю з заявамі. Прычым, на іх фоне мая страта проста смяхотная: у заявах фігуравалі сумы бязмала $200 000, - удакладняў Міхась.

Як мы ўжо ведаем, крымінальная справа на Валерыю Х. усё ж была распачатая. Цяпер, паводле дакументаў, яна знаходзіцца ў СІЗА №1 на Валадарскага.

Куды ж сыходзілі ўсе гэтыя грошы? Як устанавілі ў міліцыі, «злачынны даход фігурантка марнавала на ўласныя патрэбы, куплю ювелірных вырабаў і прадметаў мастацтва».