Фрыдман аб выбухах у Зябраўцы: Лукашэнка загнаў сябе ў кут
18- 18.08.2022, 20:30
- 38,612
Нельга выключаць далейшых дзеянняў у адказ з боку Украіны.
Ля аэрадрома «Зябраўка» непадалёк ад Гомеля ўначы 11 жніўня былі чуваць выбухі і віднеліся ўспышкі.
Крыху пазней з'явіліся спадарожнікавыя здымкі з аэрадрома «Зябраўка». Іх апублікавала кампанія Maxar Technologies. На здымках добра прыкметная пляма гары, мяркуючы з усяго - на ўзлётнай паласе. Гэтая пляма нагадвае сілуэтам самалёт. Побач з плямай размешчана некалькі адзінак тэхнікі - складана сказаць, згарэлай ці не.
Інцыдэнт у «Зябраўцы» пакуль што выклікае больш пытанняў, чым адказаў. Улады Украіны адмаўляюць сваё дачыненне, але прыклад выбухаў у Крыме кажа аб тым, што нельга выключаць і ўкраінскі след - як мінімум у якасці выпрабавальнага шара, дэманстрацыі магчымасцяў.
У аўторак з'явіліся паведамленні, што з «Зябраўкі» можа быць арганізаваны масавы абстрэл украінскай тэрыторыі. Калі гэта здарыцца, якіх наступстваў лагічна было б чакаць? На гэтае пытанне «Филину» адказаў палітычны аглядальнік і гісторык Аляксандр Фрыдман.
«Давайце параўнаем сітуацыі ў Крыме і ў Беларусі. У першым выпадку такія навіны выклікаюць аптымізм і паднімаюць украінцам і іх прыхільнікам настрой, бо дэманструюць поспехі УСУ. Калі казаць пра гісторыю пад Гомелем, то я шчыльна адсочваю рэакцыі ўкраінскага боку. Сапраўды, украінскія ўлады адхрышчваюцца ад гэтага інцыдэнту. І гэта зразумела. Бо, з аднаго боку, гэта такая ж добрая навіна», - каментуе экспэрт.
З іншага боку, калі прызнаць сваё дачыненне, невядома, як на гэта адрэагуе Лукашэнка. Ён жа сам загнаў сябе ў кут, паабяцаўшы ў выпадку нападу на Беларусь, адказаць на гэта тым жа.
Трэба ўявіць сітуацыю: Кіеў прызнаў сваё дачыненне да інцыдэнту ў «Зябраўцы». Што павінен у такім выпадку рабіць Лукашэнка? Ды яшчэ калі ўявіць, што Крэмль на яго цісне: «Ты ж сам казаў, што адкажаш на ўдар? Дык чаму не адказваеш, чаму не пасылаеш свае войскі?»
На думку аглядальніка, у прызнанні сваёй датычнасці мінусаў больш і для ўкраінскага, і для беларускага боку. Кіеў не зацікаўлены ў тым, каб на яго тэрыторыі накіраваліся яшчэ і беларускія войскі або рэжым Лукашэнкі стаў больш актыўна дзейнічаць.
«Таму я думаю, што б ні адбывалася найбліжэйшым часам на тэрыторыі Беларусі, украінскія ўлады будуць спасылацца на нейкія сілы ўнутры нашай краіны, якія дзейнічаюць самастойна. І такія намёкі ўжо былі ў сувязі з падзеямі ў «Зябраўцы», маўляў, гэта хутчэй за ўсё нейкія беларускія партызаны», - прагназуе гісторык.
Калі ж гэтыя прагнозы спраўдзяцца, калі здарыцца масаваны ўдар з тэрыторыі Беларусі, а ў аўторак паведамлялі аб ударах па Жытомірскай вобласці, то нельга выключаць магчымасць у адказ дзеянняў Украіны.
«Я ўважліва сачу за грамадскай думкай ва Украіне. У якасці прыкладу магу прывесці тэлеграм-канал былога дэпутата Вярхоўнай Рады Барыслава Бярозы, які прадстаўляе радыкальную пазіцыю. Ён адкрыта марыць пра ўдар у адказ па Беларусі. Калі ўкраінскае войска прыме такую пастанову і нанясе ўдар па беларускай тэрыторыі, я думаю, украінцы супраць гэтага пратэставаць не будуць. Якой будзе рэакцыя Беларусі? Складана ўявіць, тут ужо пытанні да Лукашэнкі», - падсумаваў Фрыдман.