Расейцы бягуць ад мабілізацыі ў Грузію нават на роварах

Усплылі цікавыя дэталі.

Расейцы масава бягуць з Расеі пасля абвяшчэння 21 верасня прэзідэнтам РФ Уладзімірам Пуціным частковай мабілізацыі насельніцтва для вайны супраць Украіны. На ўсіх даступных для грамадзян РФ кірунках назапасіліся шматкіламетровыя «коркі», некаторыя патэнцыйныя «прызыўнікі» пераязджаюць мяжу на роварах.

Расейцы штурмуюць межы Грузіі і Фінляндыі, бягуць таксама ў Турцыю, Аб'яднаныя Арабскія Эміраты і Сербію. Аб гэтым піша італійскае выданне La Repubblica.

Тысячы грамадзян РФ, спалохаўшыся абвешчанай Пуціным частковай мабілізацыі, спрабуюць уцячы з Расеі. Бягуць, пераважна, у краіны, якія яшчэ не ўвялі візавы рэжым з дзяржавай-агрэсаркай, напрыклад, у Грузію.

Мяжу расейцы перасякаюць усімі магчымымі спосабамі: на цягніку, самалёце і нават ровары. Да такога незвычайнага спосабу пакінуць «вялікую Расею» звярнуўся, напрыклад, 30-гадовы расеец, які праз боязь, што яго выезду перашкодзяць расейскія праваахоўныя органы, сеў на двухколавы транспарт. Справа ў тым, што ўлады Грузіі забараняюць пешы пераход расейска-грузінскай мяжы.

Італійскае выданне таксама нагадвае, што «частковая мабілізацыя» ў РФ можа ў рэальнасці апынуцца не такой ужо «частковай» - і што апазіцыйныя расейскія СМІ паведамілі, што паставіць пад ружжо ў Крамлі плануюць не 300 тысяч рэзервістаў, як заяўлялася, а не менш за мільён грамадзян.

І страх быць забітым на вайне ва Украіне штурхае да ўцёкаў «тысячы, а можа быць - і дзясяткі тысяч расейцаў».

Грузію расейскія дэзерціры выбіраюць на дзве асноўныя прычыны. Па-першае, грузінска-расейская мяжа мае вялікую працягласць. Па-другое, сама Грузія з'яўляецца адной з нямногіх краін свету, якая яшчэ не ўвяла візавы рэжым з РФ. Расейцы бягуць туды нягледзячы на тое, што Расея дзясяцігоддзямі падтрымлівала сепаратыстаў у двух грузінскіх рэгіёнах - Паўднёвай Асеціі і Абхазіі, а ў 2008 годзе развязала супраць Грузіі вайну.

«Цяпер мабілізацыя сотняў тысяч расейскіх рэзервістаў на загад Пуціна можа прывесці да новага элемента напружанасці паміж двума народамі. На мяжы з Грузіяй стаяць шматкіламетровыя чэргі аўто: уцекачоў, якія не жадаюць у канчатковым выніку весці агрэсіўную вайну, у якую яны, відавочна, не вераць. Некаторыя выкарыстоўваюць ровары, каб паскорыць апошнюю частку шляху. Адзін з іх распавёў ВВС, што чакаў дванаццаць гадзін, перш чым перайсці мяжу», - адзначылі ў La Repubblica

Паводле інфармацыі выдання, расейскія памежнікі выезду грамадзян РФ з краіны пакуль не перашкаджаюць. Аднак велізарны наплыў уцекачоў і спешка, з якой яны імкнуцца збегчы са сваёй радзімы, сведчыць аб асцярогах расейцаў, што вельмі хутка Крэмль можа закрыць мяжу, каб прадухіліць масавыя ўцёкі патэнцыйнага «гарматнага мяса».

Бягуць расейцы і ў Фінляндыю, хаця для ўезду ў гэтую краіну неабходная віза. Пасля ўказа аб частковай мабілізацыі колькасць «турыстаў» з РФ, якія жадаюць уехаць у Фінляндыю, істотна ўзрасла. Таксама павялічылася колькасць расейцаў, якія ўязджаюць у Сербію, ААЭ і Турцыю.

Так, у Турцыі паведамілі аб значным павелічэнні продажаў авіяквіткоў з Масквы ў Стамбул у адзін канец. Небывалы ажыятаж узняў кошты квіткоў да тысячы еўраў за рэйс.

А ў Нямеччыне заявілі аб гатоўнасці даць прытулак расейцам, якія бягуць «ад рэпрэсій», нягледзячы на тое, што ў пераважнай большасці расейскае грамадства падтрымлівала агрэсію супраць Украіны і ўварванне расейскіх войскаў на тэрыторыю суседняй дзяржавы.

У той жа час, іншыя дзяржавы, якія мяжуюць з Расеяй, такія краіны Балтыі Літва, Латвія і Эстонія, а таксама Чэхія, заявілі, што не маюць намеру дазваляць уезд расейскім бежанцам з якой-небудзь прычыны.

У брытанскім міністэрстве абароны канстатавалі, што пастанова аб абвяшчэнні мабілізацыі ў РФ не знайшло падтрымкі сярод расейцаў.

«Мабілізацыя выяўляецца вельмі непапулярнай сярод насельніцтва Расеі. Пастанова Пуціна з'яўляецца прызнаннем таго, што Расея вычарпала свой запас добраахвотнікаў, якія жадаюць ваяваць ва Украіне. Але гэта вялікая рызыка для лідара Крамля», - працытавала італійскае выданне справаздачу брытанскага МА.