УСУ адбілі ў войскаў РФ важны чыгуначны вузел

Праз яго вораг накіроўваў сваю ваенную тэхніку на тэрыторыі Луганскай і Данецкай абласцей.

УСУ адбілі ў акупантаў Купянск-вузлавы ў Харкаўскай вобласці і амаль цалкам яго кантралююць. Гэты населены пункт быў важным лагістычным вузлом для расейцаў.

Пра гэта паведаміў кіраўнік Харкаўскай АВА Алег Сінягубаў у эфіры тэлемарафону, піша rbc.ua.

Паводле ягоных словаў, яшчэ блізу 6% тэрыторый Харкаўскай вобласці да гэтага часу застаюцца акупаванымі, але пасля такога поспеху УСУ «іх крыху менш».

«Сапраўды, у расейцаў было некалькі важных кірункаў – гэта Ізюм, так званая "ізюмская вышыня". Умоўна кажучы, шлях, па якім вораг накіроўваў сваю ваенную тэхніку на тэрыторыі Луганскай і Данецкай абласцей, дзе ўзмацнялі сваю прысутнасць. І, вядома, Купянск-вузлавы – гэта адна з самых вялікіх чыгуначных лагістычных развязак на тэрыторыі Харкаўскай вобласці, якая з пачатку поўнамаштабнай вайны была акупаваная і яе вораг даволі моцна абараняў і трымаў. Дзякуючы паспяховай ваеннай аперацыі УСУ дакладна яе цяпер адбілі і фактычна цалкам кантралююць», – заявіў Сінягубаў.