CNN: Паблізу месца выцечкі газу з «Паўночнага струменю» знаходзіліся караблі ВМФ Расеі

Данія і Швэцыя праводзяць расследаванне.

Еўрапейскія спецслужбы ў панядзелак і аўторак заўважылі караблі падтрымкі ВМФ Расеі паблізу ад выцечак у трубаправодах «Паўночнага струменю», якія, верагодна, былі выкліканыя падводнымі выбухамі.

Пра гэта піша CNN са спасылкай на двух прадстаўнікоў заходняй выведкі і яшчэ адну крыніцу, знаёмую з гэтым пытаннем, прадстаўнікоў еўрапейскай службы бяспекі.

Няясна, ці мелі караблі якое-небудзь дачыненне да гэтых выбухаў, кажуць гэтыя ды іншыя крыніцы, але гэта адзін са шматлікіх чыннікаў, якія будуць вывучаць следчыя.

Паводле словаў аднаго з прадстаўнікоў выведкі, на мінулым тыдні недалёка ад гэтых раёнаў таксама былі заўважаныя расейскія падводныя лодкі.

Тры афіцыйныя асобы ЗША заявілі, што ў ЗША пакуль няма падрабязнага тлумачэння таго, што адбылося праз некалькі дзён пасля таго, як выбухі, відаць, выклікалі тры асобныя і адначасовыя выцечкі ў двух трубаправодах у панядзелак.

Расейскія караблі рэгулярна плаваюць у гэтым раёне, паводле словаў аднаго дацкага вайсковага чыноўніка, які падкрэсліў, што прысутнасць караблёў не абавязкова паказвае на тое, што Расея нанесла шкоду.

«Мы бачым іх кожны тыдзень. Расейская актыўнасць у Балтыйскім моры ўзмацнілася апошнія гады. Яны даволі часта правяраюць нашу актыўнасць – як у моры, так і ў паветры», – сказаў гэты чалавек.

Але назіранні па-ранейшаму выклікаюць дадатковыя падазрэнні ў дачыненні да Расеі, якая звярнула найбольшую ўвагу як еўрапейскіх, так і амерыканскіх афіцыйных асобаў. Яна, як мяркуецца, мае як магчымасць, так і матывацыю для наўмыснага пашкоджання трубаправодаў.

У ЗША адмовіліся каментаваць інфармацыю пра караблі.

І Данія, і Швэцыя праводзяць расследаванне, але агляд месца яшчэ не праведзены, і падрабязнасці, што менавіта выклікала выбухі, застаюцца ўрыўкавымі. Адзін еўрапейскі чыноўнік сказаў, што ўрад Даніі праводзіць ацэнку, і можа спатрэбіцца да двух тыдняў, каб расследаванне было належным чынам пачатае, таму што ціск у трубах абцяжарвае набліжэнне да месца выцечкі – хоць іншая крыніца, знаёмая з гэтым пытаннем сказала, што расследаванне можа пачацца ужо ў нядзелю.

CNN звярнуўся да Міністэрства абароны Расеі па каментары наконт прысутнасці караблёў.

Інцыдэнт на дзвюх нітках «Паўночнага струменю»

Прэм'ер-міністры Даніі і Швэцыі публічна заявілі ў аўторак, што выцечкі, верагодна, былі вынікам наўмысных дзеянняў, а не выпадковасцяў, а служба бяспекі Швэцыі ў сваёй заяве ў сераду заявіла, што нельга выключаць, «што за гэтым стаіць замежная дзяржава». Дарадца ў нацыянальнай бяспецы ЗША Джэйк Саліван у аўторак увечары таксама назваў выцечку інфармацыі «відавочным сабатажам».

Але высокапастаўленыя заходнія чыноўнікі да гэтага часу не прыпісваюць напад Расеі ці якой-небудзь іншай краіне. У той самы час Мінабароны Вялікай Брытаніі мяркуе, што за падрывам трубаў стаіць менавіта Расея.

Крэмль публічна адмаўляе нанясенне ўдараў па трубаправодах. Прэс-сакратар назваў гэтае абвінавачанне «прадказальна дурным і абсурдным».

26 верасня 2022 года кампанія-аператар Nord Stream заявіла, што прапускная здольнасць у абедзвюх нітках газаправода «Паўночны струмень» упала да нуля праз рэзкае зніжэнне ціску. Уначы ціск упаў і ў трубаправодзе «Паўночны струмень – 2», які ідзе ўздоўж «Паўночнага струменю» па дне Балтыйскага мора.

27 верасня з'явілася інфармацыя, што ў раёне «Паўночнага струменю» прагрымелі выбухі.

28 верасня лідары заходніх краінаў зрабілі эмацыйную заяву датычна «Паўночнага струменю». У той самы дзень заяву датычна «Паўночнага струменю» зрабілі і ў ЕЗ. У СМІ адразу ж пачала з'яўляцца інфармацыя, што «Паўночны струмень» будзе пахаваны.

Хоць газаправод «Паўночны струмень – 2» і запоўнены газам, ён не быў выкарыстаны для экспарту паліва з Расеі. Праз расейскае ўварванне ва Украіну Нямеччына замарозіла працэс сертыфікацыі газаправоду і ён не быў запушчаны.