Параўналі працэс школьнага навучання ў Польшчы і Беларусі

Ацэнкі ў польскіх школах ставяць паводле 6-балавай шкалы.

Тэлеграм-канал «МКБ» наважыў параўнаць працэс школьнага навучання ў Польшчы і Беларусі:

- Адразу хацелася б адзначыць, што ў Польшчы дзецям да 18 гадоў дзяржава выплачвае штомесячную дапамогу 500 злотых (265 рублёў). Перад пачаткам новага навучальнага года кожнаму вучню выплачваюць 300 злотых (160 рублёў), для збору ў школу. Гэтую дапамогу выплачваюць абсалютна ўсім, незалежна ад дастатку сям'і.

"Лінейка" ў Польшчы доўжыцца 10-20 хвілін, і для кожнага класа ўстаноўлены свой час, далей вучні разыходзяцца ў класы, дзе настаўнікі раздаюць расклад і адпускаюць дадому. Ніякага табе публічнага занятку.

На 1 верасня ніхто не дорыць настаўнікам кветкі, бо гэта свята для дзяцей. Школа дае дзецям падручнікі задарма.

Ніякай школьнай формы або справовага стылю, дзеці ходзяць у тым, у чым ім зручна. Субота - непрацоўны, ніякіх факультатываў не прадугледжана.

Дзіця можа хварэць да двух тыдняў без медыцынскай даведкі, дастаткова проста папярэдзіць настаўніка.

У малодшых класах няма хатняга задання, ад слова зусім. Ацэнкі ў польскіх школах ставяць паводле 6-балавай шкале, але толькі пачынаючы з 4 класа. У 1, 2 і 3 класе дзецям ставяць "апісальныя ацэнкі" — выкладчык піша, наколькі дзіця добра чытае, піша, ведае замежную мову.

Так, у Польшчы адрозна ад Беларусі няма 4-х чвэрцяў, ёсць толькі 2 сэмэстры, аднак шмат вольных дзён, якія падобныя да міні-вакацый. Напрыклад, Велікодныя вакацыі доўжацца 6 дзён, і на Дзяды таксама вольны дзень.

За правільныя адказы ў польскай школе дзіця будуць вельмі моцна хваліць, а за няправільныя лаяць не будуць.

Калі настаўнік выклікаў дзіця, а той не ведае правільнага адказу, настаўнік не пасадзіць яго з дрэннай ацэнкай, а наадварот будзе даваць падказы, каб дзіця само прыйшло да правільнага адказу і такім чынам запомніла яго.

Зазвычай у школе ў Польшчы дзеці звяртаюцца да настаўнікаў скарочанымі формамі імёнаў, напрыклад, пані Ася (поўнае імя Ёана).

У польскіх школах не практыкуюць збор сродкаў. Ёсць бацькоўскія фонды, у якія бацькі ўносяць пэўныя сумы, і гэтыя грошы выкарыстоўваюць выключна для вольнага часу дзяцей (экскурсіі, узнагароды, падарункі ды іншае).

У польскіх школах таксама ёсць група падоўжанага дня, і пайсці туды могуць абсалютна ўсе дзеці да 4 класа, адрозна ад Беларусі, дзе ў групу бяруць толькі першакласнікаў, дый то толькі праз знаёмства або са шматдзетных сем'яў.

Летнія вакацыі ў Польшчы пачынаюцца 1 ліпеня, аднак месяц чэрвень у польскай школе наўрад можна назваць навучальным, гэты месяц прысвечаны экскурсіям, выправам, папаскам, гульням і забаўкам. І нават практыкуецца «начлег у школе» – раз на год дзеці застаюцца ў школе з начлегам, ладзяць «піжамную вечарыну», для таго, каб бацькі змаглі крыху адпачыць.

Дзеці ў Польшчы - паўнапраўныя і раўнапраўныя людзі, такія ж, як дарослыя.