Стральбу ў Карлавым універсітэце ў Празе зладзіў 24-гадовы студэнт філасофскага факультэта
24- 21.12.2023, 20:37
- 19,542
Загінулі не менш за 15 чалавек.
Стральбу ў Карлавым універсітэце ў цэнтры Прагі зладзіў студэнт. Раней яго абвясцілі ў вышук паводле падазрэння ў датычнасці да гвалтоўнай смерці ў адным з чэшскіх сёлаў, паведамляе выданне Novinky.cz.
Днём 21 снежня паліцыя Чэхіі абвясціла ў вышук 24-гадовага Давіда Козака – яго западозрылі ў датычнасці да гвалтоўнай смерці ў адным з чэшскіх сёлаў. У гэты час у Карлавым універсітэце ў цэнтры Прагі невядомы ўчыніў масавую стральбу, пасля чаго наклаў на сябе рукі.
Гэтым стралком аказаўся Давід Козак. Ён быў студэнтам філасофскага факультэта ў Карлавым універсітэце. Вядома, што ён атрымаў ступень бакалаўра гісторыі і еўрапейскіх даследаванняў, а потым атрымаў ступень магістра гісторыі – ён займаўся вывучэннем гісторыі Польшчы.
Ягоныя матывы высвятляюцца.
Нагадаем, днём 21 снежня ў Карлавым універсітэце ў выніку масавай стральбы загінулі 10 чалавек, сама меней 20 атрымалі раненні. Пазней стала вядома, што загінулых – не менш за 15.