У Беларусі забаранілі прадаваць аўтахімію расейскага вырабу

Якія тавары патрапілі ў «чорны спіс».

Дзяржаўны санітарны нагляд Гомельскай вобласці ў студзені 2023 года выявіў у продажы 4 найменні няякаснай імпартнай прадукцыі, якая не адпавядае патрабаванням бяспекі, паведамляе БелТА.

Не прайшла праверанне незамярзальная вадкасць "Леднік" расійскага ТАА "Вектар Плюс" (Ніжненаўгародская вобласць, Дзяржынск). Тавар не адпавядае патрабаванням бяспекі што да змяшчэння метанолу.

Гэты ж санітарна-хімічны паказчык не вытрымалі і ў шклоабмывальнай нізказамярзальнай вадкасці Ice Chrome вытворцы ТАА "Рэсурс" (Новасібірск) і ў зімовай шклоабмывальнай вадкасці Arctic Ice смаленскага ТАА "Гарызонт".

Акрамя таго, у спісе тандэтных тавараў і алюмініевая харчовая фольга "VIP Стандарт" маскоўскага ТАА "Інтрапластыка". Прадукцыя не адпавядае патрабаванням бяспекі.

Паводле выяўленых фактаў Дзяржаўны нагляд рэгіёну зрабіў захады для канфіскацыі прадукцыі з рэалізацыі і недапушчэнні абарачэння.