У Нямеччыне будуць баставаць працаўнікі аэрапортаў
- 12.03.2023, 20:43
- 3,702
У некалькіх аэрапортах скасавалі сотні авіярэйсаў.
У панядзелак дзясяткам тысяч авіяпадарожнікаў зноў давядзецца рыхтавацца да значных затрымак і скасавання рэйсаў у некалькіх аэрапортах Нямеччыны.
Пра гэта паведамляе Spiegel.
Аэрапорты Гамбурга, Гановера, Брэмена і сталічны аэрапорт Бэрлін - Брандэнбург BER будуць баставаць цэлы дзень на пастанову прафзвязу Ver.di. Гэта таксама павінна паўплываць на іншыя аэрапорты.
Прафзвяз заклікаў ахоўнікаў і іншых работнікаў пачаць забастоўку. Чакаецца павелічэнне часу чакання і нават скасаванне рэйсаў, заявілі ў Ver.di на выходных.
Паводле звестак асацыяцыі аэрапортаў ADV, цяпер скасаваны 351 рэйс. Непасрэдна пацярпелі 45000 пасажыраў. Чакаецца, што агулам пацерпяць амаль 100 000 пасажыраў, бо рэйсы з іншых аэрапортаў таксама будуць скасаваныя. Асацыяцыя раскрытыкавала тое, што падарожнікі зноў стануць пешкай у працоўным канфлікце, і паскардзілася на тое, што абвестка была зробленая за кароткі тэрмін. Пасажыры наўрад ці будуць мець магчымасць шукаць альтэрнатывы.
Са слоў прафзвязу, прычынай забастоўкі з'яўляюцца няўдалыя калектыўныя перамовы ў аплаце работнікам службы авіяцыйнай бяспекі за працу ў нязручны час. Але перамовы што да працаўнікоў службаў наземнага абслугоўвання і працаўнікоў дзяржаўнага сектара на федэральным і мясцовым узроўнях таксама мелі сваю ролю. Ver.di кажа, што вядзе перамовы з Федэральнай асацыяцыяй кампаній у авіяцыйнай бяспецы (BDLS) на працягу многіх гадоў. Сума даплат не падвышалася з 2006 года, а размовы аб яе павелічэнні вядуцца з 2013 года. Працадаўцы яшчэ не падалі прапановы.
Папераджальныя забастоўкі ў аэрапортах могуць быць толькі прэлюдыяй да далейшага спынення працы ў іншых галінах транспартнага сектара. Чыгуначны і транспартны прафзвяз EVG зараз вядзе перамовы з Deutsche Bahn і 50 іншымі чыгуначнымі кампаніямі аб новых калектыўных дамовах. Да 23 сакавіка ён сустрэнецца з кожнай з гэтых кампаній прынамсі адзін раз. Пасля гэтага будзе складзены баланс і прынятая пастанова аб далейшых захадах, паведаміў на выходных прадстаўнік EVG.