Прэзідэнтка Малдовы збірае Вялікі нацыянальны сход

Гэта неабходна для таго, каб падтрымаць еўрапейскую інтэграцыю.

Прэзідэнтка Малдовы Мая Санду заклікала грамадзянаў краіны сабрацца 21 траўня на плошчы Вялікага нацыянальнага сходу ў цэнтры Кішынёва. Гэта неабходна для таго, каб падтрымаць еўрапейскую інтэграцыю.

Пра гэта піша NewsMaker.

«Дакажам усяму свету, што грамадзяне Малдовы хочуць міру і дэмакратыі ў сваёй краіне, хочуць, каб Малдова стала часткай ЕЗ», – сказала Санду.

Прэзідэнтка Малдовы нагадала, што ў Кішынёве праходзілі шматлікія акцыі пратэсту, арганізаваныя «Рухам для народа» і партыяй «Шор».

«Час паказаў, што мы абралі правільны шлях, і тыя, хто марыў дэстабілізаваць сітуацыю ў Малдове, пацярпелі няўдачу. Але брудныя грошы ад тых, хто хоча дэстабілізаваць сітуацыю ў краіне, прадаўжаюць паступаць. Некаторыя бачаць тое, што адбываецца ва Украіне, і радуюцца злачынствам. Гэтыя людзі, якія прадалі сваю краіну, гатовыя зраўнаваць нашы вёскі і гарады з зямлёй, каб вярнуцца да ўлады. Група зладзеяў, якім плацяць брудныя грошы, паставіла сваёй мэтай перашкодзіць нашаму еўрапейскаму шляху, нашаму шляху да міру і росквіту», – заявіла Санду.

Акрамя гэтага, яна мяркуе, што шмат у каго ствараецца памылковае ўражанне, што грамадзяне Малдовы глядзяць на тое, што адбываецца, з абыякавасцю.

«Шмат хто памылкова мяркуе, што грамадзяне нашай краіны абыякавыя і не робяць ніякіх дзеянняў. Некаторыя да гэтага часу сумняваюцца, ці сапраўды наш народ хоча ўступіць у Еўразвяз. Я прапаную адказаць ім», – сказала яна.

Прэзідэнтка Малдовы мяркуе, што яе краіне час паказаць, як адстойваць дэмакратыю.

«Мы хочам, каб Еўразвяз стаў нашым домам. Збярэмся, як мы сабраліся, калі патрабавалі незалежнасці і атрымалі яе. Так сама, як мы аб'ядналіся і абаранялі нашу дэмакратыю і стаялі на сваім у самыя цяжкія часы. Таму збярэмся цяпер», – заклікала яна.

Санду расказала, што ўжо ў найбліжэйшы час плануе больш падрабязна абмеркаваць дэталі сходаў, якія рыхтуюцца, з грамадзянскай супольнасцю і палітычнымі сіламі.

«Нават калі ў нас часам розныя меркаванні, цяпер не час для сварак і расколу. Цяпер час аб'яднацца і разам стаць часткай еўрапейскай сям'і. Вялікія пастановы прымаюцца людзьмі на плошчы Вялікага нацыянальнага сходу», – падкрэсліла яна.