Андрэй Саннікаў: Бунт у Расеі можа падштурхнуць беларускіх карнікаў да дзеянняў

Стала відавочна, што Пуцін доўга ва ўладзе не пратрымаецца.

Лідар грамадзянскай кампаніі «Еўрапейская Беларусь», былы кандыдат у прэзідэнты Андрэй Саннікаў у інтэрв'ю выданню 15min.lt папярэджвае Літву аб небяспецы. Аляксандр Лукашэнка і такі ж вар'ят Уладзімір Пуцін могуць снаваць планы нападу на краіны NATO. На ягоную думку, непрызнаны кіраўнік Беларусі застаецца васалам прэзідэнта Расеі.

Выйсце толькі адно

Са слоў Саннікава, роля Лукашэнкі ва ўрэгуляванні канфлікту з «Вагнерам» зводзілася да таго, што ён проста выконваў даручэнні Крамля.

«Згадзіцеся, даволі дзіўна, калі сур'ёзны канфлікт у адной краіне раптам пачынае развязваць кіраўнік іншай краіны.

І ўжо зусім дзіўна, што інфармацыя аб урэгуляванні ўпершыню з'яўляецца ў паведамленнях іншай краіны, а не ў крамлёўскіх крыніцах.

Мабыць, Пуцін наважыў, што яму не выпадае прыніжацца да размовы з кіраўніком «Вагнера», і даручыў гэта свайму васалу».

“У Лукашэнкі больш няма хаўруснікаў, толькі Пуцін. І ў таго больш нікога няма, толькі Лукашэнка, вось яны і трымаюцца адзін за аднаго, як два ідыёты», - дадаў Саннікаў.

На ягоную думку, бунт вагнераўцаў настолькі агаліў праблемы Расеі, што стала зразумела, што падзенне крамлёўскага рэжыму - толькі пытанне часу.

“Пасля гэтага бунту Пуціна проста не стала. Ён паказаў, што ён слабы. Калі нехта захоча з ім паквітацца, лепшага часу не знайсці. І Пуцін, і Лукашэнка - гэта банальныя крымінальнікі, а не законныя кіраўнікі дзяржаў. Асабліва Лукашэнка: яго ніхто не абіраў, ніхто не падтрымлівае, яго проста ўсё ненавідзяць.

А Пуцін, які так доўга спрабаваў стварыць вобраз моцнага і нязломнага лідара, паказаў, што ён баязлівы і слабы.

На мой погляд, самай вялікай памылкай Пуціна пасля бунту была пастанова аб спыненні крымінальнай справы ў дачыненні да Яўгенія Прыгожына па факце загубы вайскоўцаў, бо загінулі некалькі афіцэраў расейскага войска. Гэта людзі, якіх ён, як гетман узброеных сіл, паводле ідэі павінен абараняць.

А замест пакарання ён спыніў справу супраць сапраўдных бандытаў, крымінальнікаў, якія ваююць разам з Прыгожыным. Дык які ж ён лідар пасля гэтага? Я думаю, што ўся гэтая сітуацыя стала свайго кшталту лакмусавай паперкай - неўзабаве мы ўбачым працэсы раскідання. Яны ўжо пачаліся», - перакананы Саннікаў.

Літве варта хвалявацца

На пытанне, ці можа «вагнераўскі бунт» даць старт падрыхтоўцы Расеі да нападу на адну з краін NATO, Саннікаў выказаў меркаванне, што такую магчымасць не трэба выключаць.

«Пуцін - ненармальны, таму ён сапраўды можа планаваць такі напад і выкарыстоўваць для гэтага Лукашэнку.

Напрамкаў удару можа быць некалькі - могуць паспрабаваць засяродзіць сілы і пайсці на Кіеў, але я б не выключаў, што мэтамі могуць быць і Літва, і Латвія, і Польшча - краіны, якія маюць агульную мяжу з Беларуссю».

На думку Саннікава, непрызнаны кіраўнік Беларусі не адважыўся аддаць загад ваяваць на тэрыторыі Украіны, бо разумеў, чым гэта можа для яго абярнуцца.

«Народ краіны, апазіцыя вельмі выразна далі яму зразумець, што такі ягоны крок скончыцца для яго сумна.

Тая нянавісць да Лукашэнкі, якая праявілася пасля апошніх «выбараў», нікуды не знікла, а толькі ўзмацнілася. І гэта пагаршаецца рэпрэсіямі, якія адбываюцца ўнутры краіны. Лукашэнка проста баіцца, што калі ён выканае загад Пуціна аб уступленні ў вайну, то яго вельмі хутка не стане. Гэта было б апошняй кропляй.

А для таго, каб забяспечыць лаяльнасць войска, у яго проста бракуе сродкаў.

Ён добра плаціць «гестапаўцам», якія збіваюць мірных грамадзян, а для войска ў яго ўжо няма грошай, каб «купіць» ідэалагічную лаяльнасць салдат», - заявіў беларускі палітык.

Cа слоў Саннікава, Лукашэнка разумее таксама, што прамы ўдзел у вайне з Украінай можа скончыцца тым, што беларускія салдаты проста далучацца да ўкраінскіх салдат і разам будуць змагацца супраць расейцаў.

Вялікая таксама імавернасць таго, што пачнецца масавае дэзерцірства. Лукашэнка можа проста застацца без войска.

Палітык падкрэсліў, што Лукашэнка з'яўляецца адзіным саюзнікам рэжыму Пуціна, таму даволі дзіўна, што ўжо больш за год санкцыі выкарыстоўваюцца толькі да Расеі, а ў дачыненні да рэжыму ў Беларусі ніякіх новых санкцыйных пакетаў прапанавана не было.

«Чаму гэта? Якія лобі дапамагаюць выжыць Лукашэнку? Гэта вельмі важныя пытанні. Таму што небяспека, якая зыходзіць ад гэтага рэжыму, пагражае не толькі Украіне, але і ўсёй Еўропе, і яна ўзрастае. Калі «вагнераўскія» злачынцы з'явяцца ў Беларусі, то гэта будзе пагражаць Украіне. Гэта зусім непрымальна», - заявіў палітык.

Саннікаў падкрэсліў, што рэжым у Беларусі адрозніваецца ад рэжыму ў Расеі. Пасля «вагнераўскага» бунту стала відавочна, што Пуцін доўга ва ўладзе не пратрымаецца, і гэта ўжо зараз можа стаць каталізатарам унутраных змен у Беларусі.

«Вакол Лукашэнкі ёсць усяго некалькі чалавек, якія безумоўна яго падтрымліваюць, гэта злачынцы, якія катуюць і забіваюць людзей на ягоны загад.

Беларускія сілавікі павінны падумаць пра гэта і здолець своечасова перайсці на іншы бок, калі яны жадаюць выратаваць свае сем'і, сваіх дзяцей. У адваротным выпадку яны самі стануць мішэнямі.

Паглядзіце, колькі нечаканых падзей адбылося ў гэтым рэгіёне за апошні час. Чорныя лебедзі лётаюць усё часцей, і аднойчы ўсе гэтыя дыктатуры абрынуцца. Таму я б прапанаваў беларускім сілавікам дапамагчы хутчэй раскідацца абодвум рэжымам», - заклікаў ён.

«Лукашэнка перакананы, што несмяротны. Ён нават не думае пра транзіт улады.

Ён усё робіць сам, ад барацьбы з апазіцыяй да збору бульбы. Ён такі калгасны Сталін - спецыяліст ва ўсім», - усміхнуўся палітык.

На пытанне, ці можа Крэмль скарыстацца крахам улады ў Беларусі, і ці не небяспечна гэта, Саннікаў спаслаўся на досвед Літвы.

«Успомніце, што адбывалася, калі вы змагаліся за незалежнасць. Вам таксама казалі, што, калі раззлаваць Расею, можа быць вайна. Ну не паслухалі вы ўсе гэтыя запалохванні, зараз вы сябры Еўразвязу і NATO, жывяце значана лепш, чым «побач з расейцамі». «Беларусь таксама магла б гэта зрабіць, тым больш, што ў нас ёсць вялікія рэсурсы», - заявіў ён.

Крытыка Ціханаўскай

Што да магчымага сілавога варыянту змены ўлады ў Беларусі, то Саннікаў скептычна ацэньвае ролю ў ім Святланы Ціханоўскай.

«Ціханоўская - ваш прадукт. І я не жартую. Гэты ваш урад (Літвы – заўв. рэд.) абрывае ўсе кантакты з рэальнай апазіцыяй Беларусі, з нашымі партнёрамі за мяжой і носіцца з гэтай «валізкай без ручкі».

Ціханаўскую атачаюць людзі, якія стваралі гэты рэжым, а не змагаліся з ім.

Я казаў пра гэта яшчэ ў жніўні 2020 гады. Я не хачу мець нічога агульнага з гэтымі людзьмі.

Гэта самазванцы, якія называюць сябе лідарамі беларускай апазіцыі. Рэальная апазіцыя іх не прызнае і я іх не прызнаю.