Прэм'ер РФ абвясціў Скабееву і Папова найлепшымі прапагандыстамі 2023 года

Усяго ўрад РФ узнагародзіў 66 прапагандыстаў.

Урад Расеі абвясціў імёны лаўрэатаў уласнай прэміі ў галіне сродкаў масавай інфармацыі за 2023 год. Узнагародныя дыпломы і букеты кветак з рук прэм'ер-міністра РФ Міхаіла Мішусціна атрымалі 66 супрацоўнікаў расейскіх медыярэсурсаў.

З 20 намінацый пяць склалі прэміі за ўдзел у інфармацыйным суправаджэнні вайны з Украінай. Калектывы Першага канала, МІА "Расея сёння", АНА "ТБ-Навіны" ў асобе сваіх кіраўнікоў.

Сужэнская пара супрацоўнікаў УДТРК Яўгена Папова і Вольгі Скабеевай, якія вядуць прапагандысцкага ток-шоу "60 хвілінаў" на тэлеканале "Расея-1", атрымала адразу дзве ўзнагароды – адна на кожнага чальца сям'і. Як адзначаецца ў дакуменце, апублікаваным на сайце ўраду, прапагандысты адзначаныя прэміяй "за грамадзянскую мужнасць, палітычную вастрыню і паспяховае адстойванне інтарэсаў Айчыны ў інфармацыйнай барацьбе".

Спецыяльным карэспандэнтам тэлеканала "Звязда" ўручылі дыпломы "за прафесіяналізм і мужнасць" пры асвятленні баявых дзеянняў на ўкраінскай тэрыторыі. За рэалізацыю дабрачыннага праекту "Далей дзейнічаць будзем мы" і асвятленне валанцёрскай дзейнасці, накіраванай на падтрымку ўдзельнікаў "спецыяльнай ваеннай аперацыі" ўзнагародзілі галоўнага прадусара службы інтэрнэт-вяшчання АНА "ТВ-Навіны".

За "ўклад у развіццё інфармацыйна-аналітычнага вяшчання" ўзнагароджаны калектыў праграмы "Постскрыптум" каналу "ТБ-Цэнтр" на чале з сенатарам Аляксеем Пушковым. За "паспяховае развязанне задачаў, звязаных з павелічэннем аб'ёмаў і паказнікаў тэлеглядзення", і ў сувязі з 30-годдзем тэлекампаніі, атрымалі ўзнагароды пяць супрацоўнікаў канала "НТВ", першым з якіх названы Вадзім Такменеў. За "паспяховае асвятленне дзейнасці дзяржаўных органаў улады" ўзнагароджаны калектыў ІТАР-ТАСС.

За стварэнне праекту, накіраванага на папулярызацыю навукі, інфармаванне грамадзянаў аб дасягненнях расейскіх навукоўцаў, расейскіх тэхнічных навінках і перадавых распрацоўках, а таксама "значны ўклад у павышэнне прэстыжу навуковай дзейнасці" атрымалі ўзнагароды прадусар і вядоўца тэлеканала "РЕН ТБ". Гэты канал заваяваў папулярнасць сярод тэлеаўдыторыі шмат у чым дзякуючы вытворчасці і паказу дакументальных фільмаў пра прышэльцах з Нібіру, плоскую Зямлю і іншыя псеўданавуковыя тэорыі.

Таксама ўрадавыя прэміі атрымалі папулярызатары чытання сярод дзяцей і падлеткаў, актывісты гісторыка-краязнаўчай і экалагічнай тэматыкі, рэгіянальныя журналісты і стваральнікі лічбавай медыяплатформы "Арфей".

У 2023 годзе ўрад РФ выдаткаваў на дзяржСМІ з федэральнага бюджэту рэкордныя 122,1 млрдрублёў. У параўнанні з даваенным 2021 годам асігнаванні бюджэту на дзяржпрапаганду павялічыліся на 7%, ці 8 млрд рублёў на год, а калі параўноўваць з 2019 годам – амаль на 20%, ці 19 млрд рублёў штогод.

У 2024 годзе, згодна з праектам закона аб бюджэце, выдаткі застануцца блізу рэкорднай адзнакі і складуць 121,3 млрд рублёў. Штогод дзяржаўныя тэлеканалы, газеты і агенцтвы, а таксама праўладныя блогеры будуць абыходзіцца падаткаплацельнікам на суму, якая перавышае бюджэты сярэдніх расейскіх рэгіёнаў – напрыклад Уладзімірскай вобласці (93 млрд рублёў), Іванаўскай вобласці (65 млрд рублёў) або Рэспублікі Комі (107 млрд рублёў).