У Славакіі пачалі рабіць дарогі з недапалкаў

Для яе стварэння цыгарэтныя фільтры перапрацавалі ў пластыкавыя валокны.

У горадзе Ж'яр-над-Гронам (Славакія) з'явілася першая ў свеце дарога з недапалкаў. Для яе стварэння цыгарэтныя фільтры перапрацавалі ў пластыкавыя валокны, якія потым скарысталі ў якасці дадатку пры падрыхтоўцы дарожнага пакрыцця, піша «Еўрапульс».

Траса ў Ж'яр-над-Гронам – пілотны праект. Цяпер аналагічную дарогу збіраюцца зрабіць у Браціславе. Для гэтага на кірмашах, фестывалях і рынках горада ўстанавілі кантэйнеры для збору недапалкаў. Яны прымеркаваныя як для звычайных цыгарэтных фільтраў, так і для фільтраў ад сучасных прыладаў для награвання тытуню.

Недапалкі – самы распаўсюджаны від смецця, які забруджвае навакольнае асяроддзе пластыкам і шкоднымі рэчывамі. Мікрапластык, які ўтрымліваецца ў цыгарэтных фільтрах, забруджвае паветра, ваду і глебу, атручваючы людзей і жывёлаў. Еўрапейскія краіны прыдумляюць розныя спосабы ператварыць гэтае небяспечнае смецце ў карысныя матэрыялы. Напрыклад, з недапалкаў талінскіх пляжаў пастанавілі зрабіць экалагічныя ніткі, якімі друкуюць 3D-друкаркі.