Навукоўцы высветлілі, як наяўнасць братоў і сясцёр уплывае на псіхіку дзіцяці

Спецыялісты правялі аналіз звестак больш як 9400 васьмікласнікаў.

Падлеткі з вялікіх сем'яў маюць горшае псіхічнае здароўе, чым тыя, хто мае менш братоў і сясцёр. Гэта паказала даследаванне дзяцей з Кітая і ЗША, апублікаванае ў Journal of Family Issues (JFI).

Навукоўцы правялі аналіз звестак больш за 9400 васьмікласнікаў (сярэдні ўзрост 14 гадоў) з Кітая і 9100 з ЗША. 34% кітайскіх дзяцей аказаліся адзінымі дзецьмі ў сямʼі, што было чаканым вынікам кітайскай палітыкі «Адна сямʼя – адно дзіця».

І ў Кітаі, і ў ЗША падлеткі без братоў і сясцёр мелі найлепшае псіхічнае здароўе. Вынікі, атрыманыя ў ЗША, паказалі, што як зводныя, так і родныя браты і сёстры злучаны з дрэнным псіхічным здароўем. Мацней за ўсё псіхіка ў падлеткаў у ЗША пакутавала пры невялікай розніцы ва ўзросце з іншымі дзецьмі ў сямʼі.

Навукоўцы мяркуюць, што вынікі звязаны з канкурэнцыяй дзяцей за бацькоўскія рэсурсы. Гэта тлумачыць, чаму невялікая розніца ва ўзросце была асабліва шкоднай. Аднак магчыма, што ў семʼях з некалькімі дзецьмі ёсць і іншыя асаблівасці, якія негатыўна ўплываюць на дзяцей.

Іншыя навуковыя працы паказалі, што наяўнасць большай колькасці братоў і сясцёр звязана з лепшымі сацыяльнымі навыкамі сярод выхаванцаў дзіцячых садоў і меншай верагоднасцю разводу сярод дарослых. Магчыма, наяўнасць братоў і сясцёр па-рознаму ўплывае на псіхіку ў залежнасці ад якасці дачыненняў, што трэба праверыць у іншых даследаваннях.